ស៊ូស៊ិ

ស៊ូស៊ិ ឬ ស៊ូស៊ី ឬ សឹស៊ិ ឬ សឹស៊ី (ជប៉ុនៈすし, កាន់ជិៈ寿司, រ៉ូម៉ាជិៈ Sushi) ឬបាយពំនូតមានមុខ ជាអាហារជប៉ុន ដែលលាយបាយនឹងទឹកខ្មេះជប៉ុន ហើយទទួលទាបជាមួយនឹងត្រី, សាច់ ឬចម្អាមនានា ។

បើនិយាយពី ស៊ូស៊ិ គឺចង់និយាយពី ស៊ូស៊ិម៉ិស៊ិ (寿司飯/បាយលាយទឹកខ្មេះ) និងមុខមានទម្រង់ផ្សេងៗដូចជា មុខគ្រឿងសមុទ្រ, បន្លែ, ស៊ុត, ផ្សិតនិងសាច់។ ដោយសាច់ដែលយកមកប្រើអាចជាសាច់ឆៅ ឬសាច់ឆ្អិនសម្រាប់នៅបរទេស ។ ស៊ូស៊ិ ភាគច្រើនតែងតែបៀកវ៉ាសាប៊ិលើបាយ ដើម្បីបន្ថែមរសឆ្ងាញ់ពិសា ។

ស៊ូស៊ិ មានន័យដល់ការផ្សំគ្នារវាងត្រីនិងបាយ ដែលមានការវិវឌ្ឍជាច្រើនរយឆ្នាំមកហើយ ដោយកើតឡើង​ដោយសារការត្រូវការថ្នមអាហាររបស់ជនជាតិជប៉ុន ។

ពាក្យថា «ស៊ូស៊ិ» មានន័យដល់ និហ្គិរិស៊ូស៊ិ ដែលយកបាយមកពូតជាដុំៗនិងដាក់សាច់ត្រីពីលើមុខ ។

ស៊ូស៊ិ​ចម្រុះប្រភេទ
ប្រភពកំណើត	ប្រទេសជប៉ុន
សីតុណ្ហភាព	ត្រជាក់
គ្រឿងផ្សំ	បាយ

មាតិកា

១.ប្រភេទ

២.ផ្នែកនៃត្រីដែលត្រូវជ្រើសរើសមកធ្វើស៊ូស៊ិ

៣.មុខរបស់ស៊ូស៊ិ

១.ប្រភេទ

-និហ្គិរិស៊ូស៊ិ (Nigiri Sushi) ជាស៊ូស៊ិដែលមានរូបរាងសំប៉ែតដាក់សាច់ត្រីឆៅ, មឹក ។ល។ ពីលើ និងអាចដាច់វ៉ាសាប៊ិបន្តិចបន្ដួច ឬតុបតែងលម្អដោយសារ៉ាយសមុទ្រក៏បាម ។ ស៊ូស៊ិ ប្រភេទនេះមានការនិយមខ្លាំង ។

បាយពំនូតដែលរាងបួនជ្រុងមូលប៉ុននិងដាក់អាហារស្រស់ពីលើ មានវ៉ាសាប៊ិបន្តិចបន្តួចនៅកណ្ដាល អាចខ្ចប់សារ៉ាយស្ដើងៗ ។ គ្រឿងផ្សំដែលមានការនិយមគឺ ត្រីឆៅ, មឹក, អន្ទង់, ស៊ុតផ្អែម, ត្រីសែលម៉ន, ត្រីធូណា, គ្រំសមុទ្រ ឬ គ្រឿងសមុទ្រផ្សេងទៀតក៏បានដែរ ។

-ម៉ាគិស៊ូស៊ិ (Maki Sushi/ Makizushi) ឬ ណុរិម៉ាគិ (Norimaki) ឬ ម៉ាគិម៉ូណុ (Makimono) ជាស៊ូស៊ិដែលមានរូបរាងបំពង់វែង ខ្ចប់បាយ ឬត្រីដោយសារ៉ាយ ដាក់ក្នុងឈើក្រៀក ហើយមូរចូលគ្នា កាត់ជាដុំតូចៗល្មមដាក់ចូលមាត់ បែងចែកជា 4 ដូចខាងក្រោមនេះ៖

    1.ហូសូម៉ាគិ (Hosomaki) ជាស៊ូស៊ិដែលមាន​រាងដូចបំពង់មានខ្នាតតូច ខ្ចប់ដោយសារ៉ាយ ដែលភាគច្រើនមានស្នូលតែ 1 ប្រភេទដូចជា ត្រសក់, ការ៉ុត, ត្រីធូណា ជាដើម ដោយស្នូលត្រសក់ហៅថា កាប់ប៉ាក់ម៉ាគិ (Kappamaki) ជាឈ្មោះដែលមកពីបិសាចទឹកកាប់ប៉ាក់ ដែលចូលចិត្តទទួលទានត្រសក់ ដោយស៊ូស៊ិប្រភេទនេះគេនិយមទទួលទានដើម្បីលាងមាត់ខណៈពេលទទួលទានត្រីឆៅនិងអាហារដទៃទៀត ដើម្បីបន្ថែមរសជាតិឲ្យត្រីឆៅកាន់តែឆ្ងាញ់ ។

    2.អ៊ុរ៉ាម៉ាគិ (Uramaki) ជាស៊ូស៊ិដែលមាន​រាងដូចបំពង់មានខ្នាតមធ្យម មានបាយខ្ចប់សារ៉ាយ, ត្រសក់, ម៉ាយយ៉ូណេស, ប័រ​​, ការ៉ុត, សាច់ក្ដាម, ត្រីធូណា រោយដោយគ្រាប់ល្ង ។

    3.គុនកាន់ម៉ាគិ (Gunkan Maki) បាយទំនូតរូបរាងដូចស៊ុត ដោយយកសារ៉ាយរុំពំនូតបាយនិងគ្រឿងសមុទ្រ ឬដាក់អាហារស្រស់ពីលើ បន្ថែមវ៉ាសាប៊ិខាងក្នុង ភាគច្រើនជាពងត្រី, ពងបង្គា, គ្រំសមុទ្រ ។

    4.តិម៉ាគិ (Temaki) ជាស៊ូស៊ិមានរូងរាងដូចសាជី មានស្នូល ខ្ចប់បាយដោយសារ៉ាយនិងរុំដោយសារ៉ាយ​មួយ​ជាន់ជារូបសាជី ។

-អ៊ិណារិស៊ូស៊ិ (Inari Sushi) តៅហ៊ូចៀនញាត់ស្នូលស៊ូស៊ិ មានទាំងបាយ, ត្រីឆៅនិងបន្លែ ពេលខ្លះយកស៊ុតចៀនជាបន្ទះស្ដើងៗខ្ចប់ តែវានឹងមានរសជាតិផ្អែម ។

-ឈិរ៉ាស៊ិស៊ូស៊ិ (Chirashi Sushi) ជាស៊ូស៊ិដែលយកត្រីឆៅ, មឹក, បង្គា, បន្លែ។ល។ មកហាន់ជាចំណិត ដាក់លើបាយ ហើយដាក់ក្នុងចាន ដោយអ្នកស្រុកអូសាកាហៅស៊ូស៊ិប្រភេទនេះថា កូម៉ូគុស៊ូស៊ិ (Gomokuzushi) បែបកាន់សៃ ដោយគ្មានការរៀបចំអីច្រើន គ្រាន់តែដួសបាយដាក់ចាន រោយសារ៉ាយនិងបន្លែតាមចំណង់ចំណូលចិត្ត ប៉ុន្តែមិនត្រូវច្រើនពេក ។

ស៊ូស៊ិប្រភេទនេះមានការរៀបចំខុសៗគ្នាតាមតំបន់ ។

-អូស៊ិស៊ូស៊ិ (Oshi Sushi) ឬបែបកាន់សៃ មកពីស្រុកអូសាកា យកបាយដាក់សាច់ត្រីញាត់ក្នុងពុម្ពទម្រង់បួនជ្រុងទ្រវែង ហើយហាន់តូចល្មមទទួលទាន ។

-តិម៉ារិស៊ូស៊ិ (Temarizushi) ជាបាយពំនូតរាងមូលតូចៗដាក់ពីមុខស៊ូស៊ិ បន្ថែមវ៉ាសាប៊ិបន្តិចហើយខ្ចប់ដោយថង់ផ្លាស្ទីក រួចច្របាច់នឹងដៃឲ្យល្មួត ប៉ុណ្ណឹងចាត់ទុកជាការស្រេច ដោយនិយមប្រើអាហារសមុទ្រនិងអាហារស្រស់ ជាអាហារអាំងក៏បានដែរ ។

-ស៊ុហ្កាតាស៊ូស៊ិ (Sugata Sushi) ជាស៊ូស៊ិដែលយកត្រីទាំងមូលលាងឲ្យស្អាតនិងយកគ្រឿងក្នុងចេញឲ្យអស់ ហាន់ជាចង្វាមូល ហើយដាក់ពីលើបាយ ពេលខ្លះយកក្បាលនិង/ឬកន្ទុយត្រីញាត់ក្នុងបាយក៏មាន ។

-ណារេស៊ូស៊ិ (Naresushi) ស៊ូស៊ិនេះមានសណ្ឋានស្រដៀងនឹងត្រីដែលត្រូវហាន់ជាកង់ៗ ។

២.ផ្នែកនៃត្រីដែលត្រូវជ្រើសរើសមកធ្វើស៊ូស៊ិ

ជាទូទៅត្រីធូណាក្នុងស៊ូស៊ិមានផ្នែកធំៗបី៖

-អាកាមិ (Akami) ជាធូណាដែលមានសាច់ពណ៌ក្រហម គ្មានខ្លាញ់ ដែលស្ថិតនៅត្រង់ខ្នងត្រីនិងជាស៊ូស៊ិមានរូបរាងធម្មតាទូទៅ ផ្នែកសាច់ក្រហមដែលនិយមជាងគេគឺ Middle Part Of Back, Upper Part Of Back, និងផ្នែកមិនសូវមានការនិយមគឺ Bottom Part Of Back ។

-តូរ៉ូ (Toro) ជាសាច់ធូណាជាប់ខ្លាញ់ ឬរលាយក្នុងមាត់ តាមអត្ថន័យដើមរបស់ភាសាជប៉ុន ដែលជាស៊ូស៊ិមានគុណភាពល្អ, ឆ្យឹតូរ៉ូ (Chu-Toro) សាច់ពោះត្រីធូណា ជាសាច់មានខ្លាញ់ ដែលឆ្ងាញ់និងថ្លៃ, អូតូរ៉ូ (O-Toro) ជាសាច់ដែលមានខ្លាញ់តិចបំផុត ឆ្ងាញ់និងថ្លៃបំផុត ។

ផ្នែកផ្សេងទៀតមានដូចជា៖

-ក្បាល (Noten)

-ថ្ពាល់ (Hoho)

-ថ្ពាល់ក្រោយ (Kama)

ដោយផ្នែកនេះនៃត្រីធូណាអាចមិនសូវជួបប៉ុន្មាននៅតាមហាងទូទៅ មានតែហាងដែលមានមុខម្ហូបពិសេសប៉ុណ្ណោះ ។

៣.មុខរបស់ស៊ូស៊ិ

-ត្រីសែលម៉ន (Salmon)

-ត្រីធូណា (Tuna)

-ត្រីធូណាតូច (Skipjack Tuna)

-ស៊ុតផ្អែម

-ពងបង្គា

-ពងត្រីសែលម៉ន

-ពុកមាត់មឹកយក្ស

-ពងគ្រំសមុទ្រ

-មឹកឆា

-គ្រំឆា

-បង្គា

-ញាំសារ៉ាយ

-ត្រីសាបាក់

-ត្រីផ្ទោង

-ត្រីស្នែបភ័រ (Snapper Fish)

-អន្ទង់

-ត្រសក់ត្រាំ

ប្រភពឯកសាររូបភាពៈវេបសាយបរទេស