សូកូឡា
សូកូឡា
សូកូឡា (English: Chocolate)
ជាផលិតផល ដែលផលិតចេញពីគ្រាប់កាកាវ (Tropical cacao tree)
នៅតំបន់ក្ដៅ ដែលនដើមកំណើតនៅអាមេរិកកណ្ដាលនិងមិចស៊ិចនិងរកឃើញដោយជនជាតិឥណ្ឌាស្បែកក្រហមនិងជនជាតិអ៊ែសទែក្ស
(Aztecs)
ហើយបច្ចុប្បន្នបានសាយភាយនិងត្រូវដាំដុះនៅតំបន់ដែលមានអាកាសធាតុក្ដៅ ។
សូកូឡាជាគ្រឿងផ្សំនៃបង្អែមច្រើនប្រភេទ ដូចជាការ៉េម,
ស្ករគ្រាប់, ឃុកគី,
ខេកនិងសូកូឡាផាយត្រូវបានចាត់ទុកថាជាបង្អែមមួយប្រភេទដែលមានការនិយមពីមនុស្សទូទាំងពិភពលោក
។
វិធីធ្វើសូកូឡា គឺត្រាំគ្រាប់កាកាវ បន្ទាប់មកយកទៅលីង
ហើយបុកឲ្យម៉ដ្ឋ ហើយផលិតផលរបស់គ្រាប់កាកាវត្រូវបានស្គាល់នៅនាមថា «សូកូឡា»
ឬតំបន់ខ្លះ «កាកាវ» ។
ផលិតផលធ្វើដោយគ្រាប់កាកាវត្រូវបានស្គាល់ដោយឈ្មោះខុសៗគ្នានៅក្នុងពិភពលោក
។ នៅអាមេរិក ឧស្សាហកម្មសូកូឡាបានកំណត់ថា៖
-កាកាវ (cocoa) ជាគ្រាប់កាកាវ ។
-កាកាវប័រ (cocoa butter) ជាប្រេងរបស់គ្រាប់កាកាវ ។
-សូកូឡា (chocolate) ជាការផ្សំរវាងគ្រាប់និងកាកាវប័រ
។
សូកូឡាជាការលាយគ្រាប់សណ្ដែក, កាកាវ, កាវកាវប័រ, ស្ករនិងសារធាតុផ្សេងទៀតចូលគ្នាបង្កើតបានជាសូកូឡាមានរូបរាងជាបន្ទះនិងរូបរាងផ្សេងៗ
។ គ្រាប់កាកាវ ក្រៅពីធ្វើជាសូកូឡាហើយ អាចធ្វើជាភេសជ្ជៈបានទៀតផងដូចជា សូកូឡាក្ដៅ
។
ភេសជ្ជៈសូកូឡាត្រូវបានស្រាវជ្រាវដោយជនជាតិអ៊ែសទែក្ស
ក្រោយមកមានកុលសម្ពន្ធឥណ្ឌាស្បែកក្រហមនិងជនជាតិអឺរ៉ុប ។
សូកូឡាតែងតែត្រូវបានផលិតជារូបសត្វ, មនុស្ស
ឬវត្ថុតាមការស្រមើស្រមៃ ដើម្បីអបអរក្នុងពិធីនានាក្នុងពិភពលោក
ដូចជារូបទន្សាយ, រូបពងមាន់ក្នុងពិធីបុណ្យឣីស្ទ័រ (Easter), រូបកាក់ ឬសាន់តាក្លសក្នុងពិធីបុណ្យណូអែលនិងរូបបេះដូងនៅថ្ងៃបុណ្យនៃក្ដីស្រលាញ់
(Valentine)
ជាដើម ។
 |
| សូកូឡា |
មាតិកា
១.ប្រវត្តិ
១.២ សូកូឡានៅអឺរ៉ុប
២.ប្រភេទនៃសូកូឡា
២.១ សូកូឡាដែលមិនបន្ថែមជាតិផ្អែម (Unsweetened
Chocolate)
២.២ សូកូឡាខ្មៅ (Dark
Chocolate)
២.៣ សូកូឡាទឹកដោះគោ (Milk
Chocolate)
២.៤ សូកូឡាស្រាផ្អែម (Liqueurs
Chocolate)
២.៥ សូកូឡាផ្អែមឡែមៗ (Semi-Sweet
Chocolate)
២.៦ សូកូឡាផ្អែម (Sweet
Chocolate)
២.៧ សូកូឡា.ស (White
Chocolate)
២.៨ សូកូឡារាវ (Liquid
Chocolate)
២.៩ សូកូឡាគូវេចឺរ (Couverture
Chocolate)
២.១០ សូកូឡាកាណាច (Ganache
Chocolate)
២.១១ នំខ្ចប់ដោយសូកូឡា
(Confectionery Coating Chocolate)
៣.សារធាតុចិញ្ចឹម
៤.ប្រភព
១.ប្រវត្តិ
សូកូឡាត្រូវបានរកឃើញតាំងពី 2000
ឆ្នាំមុនម្ល៉េះ ក្រោយសម័យរាជិនី គ្លីអូផាត់ត្រា នៃអេហ្ស៊ីប ។ វាជាផលិតផលដែលផលិតពីគ្រាប់កាកាវ (Cacao) នៅក្នុងព្រៃក្ដៅនិងសើមនៃទ្វីបអាមេរិក ស្ថិតក្នុងពួក Theobroma cacao ប្រែ ថា អាហារនៃអាទិទេព ។
មនុស្សមួយក្រុម ដែលចេះធ្វើសូកូឡាជាអរិយធម៌បូរាណ គឺនៅប្រទេសមិចស៊ិច និងអាមេរិកកណ្ដាល ដែលជាជនជាតិម៉ាយ៉ា និងជនជាតិអ៊ែសទែក្សនៃអរិយធម៌មេសូអាមេរិកា
(Meso-America) ។ មនុស្សមួយក្រុមនេះបានយកគ្រាប់កាកាវមកបុក
ហើយលាយនឹងគ្រឿងផ្សំច្រើនប្រភេទដើម្បីធ្វើភេសជ្ជៈដែលមានរសជាតិល្វីងចត់ ។
ក្រៅពីអាចធ្វើជាអាហារបានហើយ
សូកូឡាត្រូវបានប្រើប្រាស់នៅផ្នែកសាសនានិងសង្គមទៀតផង ។
ជនជាតិម៉ាយ៉ា (250-900 នៃគ.ស) ជាជនជាតិដំបូងដែលមានភ័ស្តុតាងច្បាស់លាស់ថាបានរកឃើញអាថ៌កំបាំងរបស់ដើមកាកាវ
ដោយពួកគេបានយកដើមកាកាវមកពីព្រៃមកដាំនៅច្បារក្រោយផ្ទះ
ពេលបានផលក៏បេះយកគ្រាប់មកត្រាំ ហើយ លីង បន្ទាប់មកបុកឲ្យម៉ដ្ឋ មកឆុងទឹក ដោយរោយម្រេចនិងម្សៅពោត
លទ្ធផលគឺបានភេសជ្ជៈសូកូឡារសជាតិហឹរ មានពពុះ ។
ក្រោយមកប្រហែលនៅសតវត្សរ៍ទី14 អាណាចក្រជនជាតិអ៊ែសទែក្សបានគ្រប់គ្រងទឹកដីមួយភាគធំរប ស់ អរិយធម៌មេសូអាមេរិក
ដោយមានរាជធានីស្ថិតនៅលើទឹកដីបច្ចុប្បន្នគឺទីក្រុងមិចស៊ិច ។ ជនជាតិអ៊ែសទែក្សបានទិញគ្រាប់កាកាវពីជនជាតិម៉ាយ៉ានិងជនជាតិផ្សេងទៀត
ហើយយកពន្ធអាករពីអ្នកស្រុករបស់ខ្លួន និងឈ្លើយគិតជាគ្រាប់កាកាវជំនួសប្រាក់ ។
ជនជាតិអ៊ែសទែក្សផឹកសូកូឡាល្វីងដូចជនជាតិម៉ាយ៉ាសម័យដំបូងដែរ
ដោយលាយគ្រឿងឲ្យមានរសជាតិហឹរដោយគ្រឿងទេស
កាលនោះជនជាតិមេសូអាមេរិកមិនទាន់ដាំដុះអំពៅ ទើបគ្មានស្ករដាក់សូកូឡា ។
មានការនិយាយតៗគ្នាថា
ជនជាតិម៉ាយ៉ាដើមចូលចិត្តផឹកសូកូឡានៅថ្ងៃពិសេស ខណៈដែលរាជវង្សានុវង្សនិយមទទួលទានណាស់
ចំណែកជនជាតិអ៊ែសទែក្ស, ក្រុមអ្នកដឹកនាំជាន់ខ្ពស់, បុព្វជិត, នាយទាហានជាន់ខ្ពស់និងឈ្មួញអ្នកមានៗប៉ុណ្ណោះដែលមានសិទ្ធិទទួលទានភេសជ្ជៈដ៏ស័ក្តិសិទ្ធិនេះ
។
សូកូឡាមានតួនាទីសំខាន់នៅក្នុងពិធីក្នុងរាជវាំងនិងសាសនា ព្រោះយកគ្រាប់កាកាវធ្វើជាគ្រឿងសក្ការបូជាអាទិទេពនិងផឹកនៅក្នុងពិធីសំខាន់ ៗ ។
សម្រាប់ប្រភពនៃឈ្មោះ សូកូឡា
មិនទាន់មានការអធិប្បាយច្បាស់លាស់នោះទេ ប៉ុន្តែមានមតិពីរបានលើកឡើងថា
ដោយមតិទី1 គឺជាពាក្យក្លាយមកពីពាក្យថា Chocolatl ក្នុងភាសាម៉ាយ៉ាដែលមានន័យថា
ផឹកសូកូឡាជាមួយគ្នា ។ មតិមួយទៀតបានអធិប្បាយថាគួរតែមានប្រភពមកពីភាសាម៉ាយ៉ាដែរគឺ Chocol ប្រែថា ក្ដៅ បូកនឹងពាក្យថា
Atl របស់អ៊ែសទែក្សដែលប្រែថា ទឹក ទើបក្លាយជាពាក្យថា Chocolatl ក្រោយមកក៏ក្លាយជាពាក្យថា Chocolate នៅអឺរ៉ុប
។
តាមជំនឿរបស់ជនជាតិអ៊ែសទែក្សនៃប្រទេសមិចស៊ិច «គ្រាប់កាកាវជាអាហារដែលអាទិទេពប្រទាន ឲ្យដើម្បីធ្វើជាសញ្ញាបើកផ្លូវឆ្ពោះទៅកាន់ឋានសួគ៌» តាំងពី 4000 ឆ្នាំមុនម្ល៉េះ
ដែលធ្វើឲ្យពួកគេយកគ្រាប់កាកាវមកធ្វើជាភេសជ្ជៈ នោះគឺ ទឹកសូកូឡា ។
ក្រោយមកលោក ហ៊ឺណាន ខទេស (Hernán Cortés) អ្នករុករកជនជាតិអេស្ប៉ាញបានជិះកប៉ាល់ទៅជួបជនជាតិអ៊ែសទែក្ស ហើយបានស្នាក់នៅជាមួយជនជាតិនោះនិងផឹកសូកូឡាជាមួយគ្នា
។ លោក ហ៊ឺណាន បានយកគ្រាប់កាកាវទៅប្រទេសរបស់ខ្លួន
ដោយសាកល្បងធ្វើជាភេសជ្ជៈនិងផ្សំគ្រឿងឲ្យកាន់តែផ្អែម
ក្លាយជាភេសជ្ជៈដែលមានការនិយមនៅអេស្ប៉ាញ ក្រោយមកលោក កូអ៊ិនរ៉ាត យូហានណេស
វ៉ាន ហោធែន ឬ កូអ៊ិនរ៉ាត ជេ វ៉ាន ហោធែន (Coenraad Johannes van Houten or Coenraad J. van Houten) ជនជាតិហូឡង់បានរកឃើញវិធីធ្វើសូកូឡាប្រភេទបន្ទះ, គ្រាប់និងម្សៅ
។
១.២ សូកូឡានៅអឺរ៉ុប
មុនគ.សទី 15 ជនជាតិអឺរ៉ុបមិនទាន់ស្គាល់ភេសជ្ជៈប្រភេទនេះទេ ហើយអេស្ប៉ាញជាប្រទេសដំបូងគេ
ដែលបានធ្វើដំណើរទៅស្វែងរកភាពរុងរឿងនៅទ្វីបអាមេរិកនិងបានជួបភេសជ្ជៈដែលជារសជាតិអមតៈរបស់សូកូឡា ។
បន្ទាប់ពីឈ្នះសង្រ្គាមជនជាតិអ៊ែសទែក្សហើយ អេស្ប៉ាញបានយកសូកូឡាមកកាន់ប្រទេសរបស់ខ្លួននិងទទទួលបានការនិយមយ៉ាងខ្លាំងពីរាជវង្សានុវង្ស ។ រយៈពេល 100 ឆ្នាំការនិយមសូកូឡាបានសាយភាពទូទាំងទ្វីបអឺរ៉ុប ។
មុនពេលដែលលោក ហ៊ឺណាន មេទ័ពរបស់អេស្ប៉ាញច្បាំងឈ្នះមិចស៊ិចនៅឆ្នាំ 1521 អាចមានអ្នករុករកមួយក្រុមដំបូងបានឃើញដើមកាកាវអាមេរិកខ្លះដែរ
ប៉ុន្តែអេស្ប៉ាញក្លាយជាជនជាតិដំបូងនៅអឺរ៉ុបដែលរកឃើញរសជាតិដ៏អស្ចារ្យរបស់សូកូឡា ។
ការទំនាក់ទំនងគ្នារវាងជនជាតិអេស្ប៉ាញនិងជនជាតិអ៊ែសទែក្សបាន បើកទ្វារឲ្យជនជាតិទាំងពីរបានដោះដូរគំនិតនិងបច្ចេកវិទ្យាគ្នា
ហើយទីផ្សារអឺរ៉ុបក៏បានស្គាល់អាហារថ្មីធ្វើពីដើមកាកាវផងដែរ ។
សង្រ្គាមនៅឆ្នាំ 1521 ហ៊ឺណាន បាននាំកងទ័ពទៅច្បាំងនឹងកងទ័ពរបស់ម៉ុងតេហ៊្សូម៉ា (Montezuma) ហើយក៏បានទទួលជ័យជម្នះ ។
កងទ័ពអេស្ប៉ាញបានបង្គាប់ឲ្យមន្រ្តីអ៊ែសទែក្សយកទ្រព្យសម្បត្តិមកឲ្យខ្លួន បើចង់រស់រានបន្ត
ដែលចាត់ទុកថាជាសម្បត្តិនិងមានតម្លៃជំនួសមាសប្រាក់ ទើបក្លាយជាទ្រព្យដែលរឹបអូសពីឈ្លើយសឹក
។ កងទ័ពអេស្ប៉ាញអាងសិទ្ធិគ្រប់គ្រងចម្ការកាកាវរបស់ជនជាតិអ៊ែសទែក្ស និងរឹបអូសយកពីប្រជាជនដែលនាំសួយសារអាករមកឲ្យជនជាតិអ៊ែសទែក្ស
ក្រោយមកកាកាវនិងសូកូឡាក៏ត្រូវបញ្ជូនទៅអេស្ប៉ាញ ។
នៅអេស្ប៉ាញ ភេសជ្ជៈសូកូឡាមានការពេញនិយមលឿនណាស់
ដល់ថ្នាក់មិនគ្រប់គ្រាន់សម្រាប់តម្រូវការ ទើបត្រូវប្រើកម្លាំងពលកម្មរាប់លាន់នាក់នៅក្នុងការដាំដុ
ប្រមូលផលនិងកែច្នៃស្ករនិងកាកាវ ចាប់តាំងពីដើមសតវត្សរ៍ទី 16 ចុងសតវត្សរ៍ទី 18
កម្លាំងពលកម្មភាគច្រើនទទួលបានតម្លៃថោកហួសហេតុ ដែលធ្វើចម្ការកាកាវក្លាយជាទាសករធ្វើសូកូឡាគឺជនជាតិមេសូអាមេរិកា
។
ជនជាតិអេស្ប៉ាញមិនចូលចិត្តរសជាតិល្វីងរបស់សូកូឡា
ដែលដំបូងឡើយមេទ័ព ហ៊ឺណាន និងកងទ័ពរបស់គេមិនចូលចិត្តរសជាតិរបស់សូកូឡា
ប៉ុន្តែដើម្បីទទួលបានរសជាតិកាន់តែឆ្ងាញ់ពិសា ទើបពួកគេយកសូកូឡាទៅស្ងោរ
ហើយដាក់គ្រឿងផ្សំផ្សេងៗ ។
ពេលសូកូឡាហូរចូលមកទឹកដីអឺរ៉ុប មានអ្នកខ្លះមានគំនិតចង់ដាក់ស្ករ,
ដាក់ផ្កាចន្ទន៍និងគ្រឿងទេស ហើយភេសជ្ជៈសូកូឡាក្ដៅរសជាតិផ្អែមក៏ចាប់កំណើតឡើង ។
ទោះយ៉ាងណាក៏ដោយ ជនជាតិអេស្ប៉ាញនៅតែរក្សាវិធីត្រៀមនិងវិធីធ្វើសូកូឡាដូចដើម
ហើយនៅតែប្រើជនជាតិដើមប្រមូលផល យកទៅត្រាំ ហាល សម្អាតនិងលីងគ្រាប់កាកាវ ។
ជនជាតិអេស្ប៉ាញបានបង្កើតឧបករណ៍ថ្មីសម្រាប់ធ្វើសូកូឡាទៀតផង នោះគឺឈើកូរដែលហៅថា ម៉ូលីនីអូ
សម្រាប់កូរសូកូឡាឲ្យងាយម៉ដ្ឋ ។
ភេសជ្ជៈសូកូឡានេះមានតែជនជាតិអេស្ប៉ាញវណ្ណៈអភិជន និងបុព្វជិតសាសនាគ្រីស្ត និកាយរ៉ូម៉ាំងកាតូលិក (Priest) ប៉ុណ្ណោះដែលអាចជាវមកទទួលទានបាន ។ បុព្វជិតសាសនាគ្រីស្តបានណែនាំភេសជ្ជៈសូកូឡាដល់រាជវាំងបាន សោយ
ដោយមានរឿងតំណាលថា បុព្វជិតនិកាយរ៉ូម៉ាំងកាតូលិកបាននាំជនជាតិដើមដែលជាឈ្លើយចូលគាល់រាជបុត្រភីលីពនៃរាជាណាចក្រអេស្ប៉ាញ
(Prince Philip of Spain) ។
ឈ្លើយទាំងនោះបានធ្វើភេសជ្ជៈសូកូឡាថ្វាយរាជបុត្រសោយ ក្រោយមករាជវង្សានុវង្សក៏ឈ្លក់វង្វេងនឹងរសជាតិសូកូឡា
។
ដោយសារអេស្ប៉ាញបានគ្រប់គ្រងអាមេរិកឲ្យស្ថិតនៅក្រោមអាណានិគមនៅសម័យកាលដំបូង
ធ្វើឲ្យពួកគេធ្វើពាណិជ្ជកម្មទៅលើសូកូឡាតែមួយមុខ ហើយមានតែជនជាតិអេស្ប៉ាញដែលជាវណ្ណៈអភិជននិងជនដែលមានខ្នងបង្អែកប៉ុណ្ណោះដែលមានលទ្ធភាពជាវសូកូឡាមហាថ្លៃនេះបាន
។ ជនជាតិអេស្ប៉ាញព្រមទទួលស្គាល់ថា សូកូឡាជួយឲ្យអារម្មណ៍ស្រស់ស្រាយនិងមានអត្ថប្រយោជន៍ផ្នែកអាហារូបត្ថម្ភ
។ កាកាវមានកាឡូរីខ្ពស់តាមធម្មជាតិនិងមានជាតិកាហ្វេអ៊ីន រួមទាំងសារធាតុគីមីដែលមានគុណសម្បត្តិដែលហៅថា
Theobromine ផងដែរ ។
ក្រោយមកនៅសតវត្សរ៍ទី 16
សូកូឡាក៏ក្លាយជាភេសជ្ជៈសម្រាប់ព្រះសង្ឃសុំសីល
ហើយបន្ទាប់ពីជជែកពិភាក្សាគ្នាអស់រយៈពេលយ៉ាងយូរ សាសនាគ្រីស្ត និកាយកាតូលិកបានអនុញ្ញាតឲ្យប្រជាជនទទួលទានសូកូឡាជាអាហារប៉ូវខណៈពេលសុំសីល
ដែលជាខណៈពេលហាមទទួលទានអាហារ
ប៉ុន្តែប្រទេសផ្សេងទៀតនៅអឺរ៉ុបនៅតែគ្មានឱកាសបានទទួលទានសូកូឡា ទាល់តែ
100 ឆ្នាំក្រោយមក
ដោយសារតែជនជាតិអេស្ប៉ាញប្រឹងប្រែងរក្សាសូកូឡាទុកក្នុងប្រទេសមិនបាន ហើយដំណឹងពាក់ព័ន្ធនឹងសូកូឡាសាយភាយបានដូចម្ដេច
គ្មានអ្នកណាដឹងច្បាស់
ដឹងត្រឹមតែថាអាថ៌កំបាំងពាក់ព័ន្ធនឹងសូកូឡាត្រូវបានផ្សព្វផ្សាយនិងទទួលបានការនិយមយ៉ាងឆាប់រហ័សនៅសង្គមរាជវង្សរបស់អឺរ៉ុបនិងយូរអង្វែងរហូតដល់មកសម័យបដិវត្តន៍ឧស្សាហកម្ម
។
ប្រទេសជាច្រើននៅអឺរ៉ុបបានយកពូជកាកាវទៅដាំនៅប្រទេសក្រោមអាណានិគមដូចជា សហរដ្ឋអាមេរិក, ហូឡង់និងបារាំងសុទ្ធតែរឹបអូសយកទឹកដីនៅតំបន់អេក្ខាទ័រធ្វើជាប្រទេសក្រោមអាណានិគម
។ អង់គ្លេសបានយកដើមកាកាវទៅដាំកោះស្រីលង្កា ចំណែកហូឡង់យកទៅដាំនៅវេណេហ្ស៊ុយអេឡា,
ជ្វានិងកោះស៊ូម៉ាត្រា ឯបារាំងយកទៅដាំនៅឥណ្ឌាភាគខាងលិច ដោយ ផលប្រយោជន៍ដែលទទួលបានត្រូវនាំមកកាន់ប្រទេសដែលក្ដោបក្ដាប់អំណាចទាំងនោះ
ធ្វើឲ្យអឺរ៉ុបក្លាយជាទ្វីបនៃសូកូឡា ។
ជនជាតិអឺរ៉ុបកិនគ្រាប់កាកាវដោយម៉ាស៊ីនកិន ដែលពេលបុកិនម្ដងៗបានចំនួនច្រើនគរគោក
ចាប់ផ្ដើមពីសម័យដំបូង ប្រើត្បាល់បុក តែក្រោយមកប្រើកង្ហារខ្យល់
ខ្លះក៏ប្រើម៉ាស៊ីនកិនដោយអាស្រ័យកម្លាំងសត្វសេះ ។ ជនជាតិអឺរ៉ុបនិយមទទួលទានសូកូឡានិងស្ករដែលជាទំនិញមានតម្លៃថ្លៃមួយប្រភេទទៀតដែលត្រូវនាំចូលពីបរទេស
។ នៅចុងសតវត្សរ៍ទី 16 លោក ហានស៍ សាឡន
ពីមហាវិទ្យាល័យភូមិន្ទវេជ្ជសាស្រ្ត (The Royal
College of Physicians) បានដាក់សំណើសូកូឡារូបមន្តថ្មីជាសូកូឡាដាក់ទឹកដោះគោឲ្យកាន់តែមានរសជាតិ
។
នៅប្រទេសបារាំង សូកូឡាជាទំនិញផ្ដាច់មុខ មានរឿងតំណាលថារាជិនី
អ៊ែន នៃអូទ្រីស (Anne of Austria) ចូលចិត្តសោយសូកូឡាដល់ដំណាក់កាលញៀន
ធ្វើឲ្យរាជវាំងបារាំងត្រូវបិទរឿងនេះ ។ សូកូឡាបានក្លាយជានិមិត្តសញ្ញានៃវណ្ណៈជាន់ខ្ពស់និងមានព្រះរាជបញ្ជាហាមឲ្យជនណា
លើកលែងតែវណ្ណៈអភិជន បារាំងដែលទទួលទានសូកូឡាបាន ខុស ពីប្រទេសអង់គ្លេស
ដែលជនណាមានប្រាក់ក៏អាចទទួលទានបានដែរ ។
ហាងសូកូឡាដំបូងបើកបម្រើសេវាកម្មនៅទីក្រុងឡុងដ៍នៅឆ្នាំ 1657
ស្រដៀងនឹងហាងកាហ្វេដែលជាភេសជ្ជៈបានទទួលការនិយមច្រើនជាងនៅវេលាក្រោយមក ។ ហាងសូកូឡាជាកន្លែងទទួលទានភេសជ្ជៈក្ដៅៗដើម្បីលម្ហែអារម្មណ៍,
ជែកវែកញែករឿងនយោបាយ, ជួបមនុស្សម្នានិងលេងល្បែងស៊ីសង ហាងខ្លះទទួលតែបុរសភេទ
តែមានហាងជាច្រើនបើកបម្រើមនុស្សគ្រប់ភេទដែលមានប្រាក់ចាយ ។
ដំណាក់កាលផលិតសូកូឡាមិនបានផ្លាស់ប្ដូរខុសពីច្រើនរយឆ្នាំមុន
រហូតដល់សតវត្សរ៍ទី17 ដែលជាសម័យបដិវត្តន៍ឧស្សាហកម្មរបស់សូកូឡានោះឯងទើបមានការផ្លាស់ប្ដូរ
។
មុនសម័យបដិវត្តន៍ឧស្សាហកម្ម
ដំណាក់កាលផលិតសូកូឡាត្រូវអាស្រ័យលើកម្លាំងរបស់មនុស្ស
ដែលប្រើពេលយូរនិងចំណាយច្រើន ធ្វើឲ្យសូកូឡាត្រូវផលិតសម្រាប់តែលក់ឲ្យអ្នកមានប៉ុណ្ណោះ
ពេលអ្នកច្នៃប្រឌិតបានបង្កើតម៉ាស៊ីនចំហាយទឹកបានសម្រេច
ការផលិតសូកូឡាក៏មានចំនួនច្រើនដែរ ។ ពេលវេលាដែលត្រូវចំណាយក៏តិច
ធ្វើឲ្យសូកូឡាដែលត្រូវផលិតមានរូបរាងថ្មី មិនត្រឹមតែផលិតជាភេសជ្ជៈនោះទេ
វាមានទាំងនំផ្អែមដែលមានការនិយមទូទាំងពិភពលោកទៀតផង ។
២.ប្រភេទនៃសូកូឡា
សូកូឡាជាគ្រឿងផ្សំដែលមានការនិយមខ្លាំងនិងច្រើនជម្រើសទាំងរូបរាង
។
រូបរាងនិងរសជាតិរបស់សូកូឡាមានភាពខុសគ្នាដោយសារគ្រឿងផ្សំនិងបរិមាណនៃគ្រឿងផ្សំនៅក្នុងនោះ
ក្រៅពីគ្រឿងផ្សំហើយ រសជាតិក៏ខុសគ្នាដែរ ដោយសាររយៈពេលនិងសីតុណ្ហភាពនៃការលីងគ្រាប់កាកាវ
។
២.១ សូកូឡាដែលមិនបន្ថែមជាតិផ្អែម (Unsweetened Chocolate)
សូកូឡាដែលមិនបន្ថែមជាតិផ្អែមជាសូកូឡាសុទ្ធ
ឬត្រូវបានស្គាល់ក្នុងនាមថា សូកូឡាល្វីង ត្រូវបានប្រើប្រាស់សម្រាប់អប់អាហារនិងជាសូកូឡាដែលគ្មានលាយសារធាតុអ្វីទាំងអស់
។ សូកូឡាប្រភេទនេះមានរសជាតិល្វីងខះ ប៉ុន្តែពេលត្រូវបន្ថែមស្ករ
វានឹងក្លាយជាគ្រឿងផ្សំសម្រាប់ធ្វើនំប្រោននី, ខេក, ស្ករគ្រាប់និងឃុកគី ។
២.២ សូកូឡាខ្មៅ (Dark Chocolate)
សូកូឡាខ្មៅ ជាសូកូឡាដែលមិនបានបន្ថែមទឹកដោះគោ
ពេលខ្លះត្រូវហៅថា សូកូឡាធម្មតា តែរដ្ឋាភិបាលសហរដ្ឋអាមេរិកហៅថា សូកូឡាផ្អែម
និងកំណត់ឲ្យមានជាតិសូកូឡាសុទ្ធ 15%
ប៉ុន្តែខាងអឺរ៉ុបបានកំណត់ឲ្យមានធាតុផ្សំរបស់គ្រាប់កាកាវតិចណាស់ 35% ។
សូកូឡាខ្មៅមានសារធាតុ Flavonoid ដែលជាសារធាតុប្រឆាំងអុកស៊ីតកម្ម
បង្ការការកកើតកំណកខ្លាញ់ជាប់ភ្នាសបំពង់អាទែ មូលហេតុនៃការកើតជំងឺត្បៀតសរៃឈាមបេះដូងនិងជួយបង្ការឈាមកក
មូលហេតុនៃការកើតជំងឺស្ទះសរសៃ- ឈាមបេះដូងនិងបង្ការជំងឺសម្ពាធឈាមឡើងខ្ពស់ ។
២.៣ សូកូឡាទឹកដោះគោ (Milk Chocolate)
សូកូឡាទឹកដោះគោ ជាសូកូឡាលាយទឹកដោះគោ ឬទឹកដោះគោខាប់ ។ រដ្ឋាភិបាលសហរដ្ឋអាមេរិកបានកំណត់ថា
បើហៅថា សូកូឡាទឹកដោះគោ ត្រូវតែមានជាតិសូកូឡាសុទ្ធ 10%
ចំណែកខាងអឺរ៉ុបបានកំណត់ថាមានជាតិគ្រាប់កាកាវតិចណាស់ 25% ។
សូកូឡាប្រភេទនេះមានសារធាតុរបស់កាកាវប័រ, ទឹកដោះគោនិងស្ករ
ទុកសម្រាប់លម្អនំ ។
សូកូឡាទឹកដោះគោដែលផលិតនៅសហរដ្ឋអាមេរិកត្រូវតែមានសារធាតុសូកូឡាយ៉ាងហោចណាស់
10% និងទឹកដោះគោដែលមិនទាន់ចម្រាញ់យកជាតិប័រចេញ 12% ។
២.៤ សូកូឡាស្រាផ្អែម
(Liqueurs Chocolate)
សូកូឡាឡឺឃ្វសជាផលិតផលរបស់គ្រាប់កាកាវបុក
បន្ទាប់មកយកទៅកូរចម្រាញ់យកទឹក ។
សូកូឡានេះអាចទុកឲ្យត្រជាក់និងទុកឲ្យកកដោយការចាក់ពុម្ព
ប៉ុន្តែសូកូឡាដែលទទួលបានគឺពុំមានរសជាតិផ្អែមទេ ។
សូកូឡានេះមានសារធាតុកាកាវប័រប្រហែល 30% ។
២.៥ សូកូឡាផ្អែមឡែមៗ (Semi-Sweet Chocolate)
សូកូឡាផ្អែមឡែមៗស្ថិតនៅក្នុងសភាពរាវ
ត្រូវបន្ថែមជាតិផ្អែមនិងកាកាវប័រ ដោយពណ៌របស់វារាងខ្មៅ ។
តាមមាត្រដ្ឋានរបស់សហរដ្ឋអាមេរិកគឺមានសារធាតុទឹកសូកូឡាប្រហែល 35%
និងជាតិខ្លាញ់ប្រហែល 27% សូកូឡាប្រភេទនេះនឹងមានរសជាតិផ្អែមឡែមៗ ល្មមឆ្ងាញ់។
២.៦ សូកូឡាផ្អែម (Sweet Chocolate)
សូកូឡាផ្អែម ត្រូវបានបន្ថែមជាតិស្ករច្រើនជាងសូកូឡាប្រភេទផ្អែមឡែមៗនិងមានសារធាតុផ្សំរបស់ទឹកសូកូឡាយ៉ាងហោចណាស់
1% ។ សូកូឡាប្រភេទនេះជាគ្រឿងផ្សំសំខាន់សម្រាប់ធ្វើនំនិងតុបតែងនំ
ថែមទាំងមានជាតិប្រេងដូចសូកូឡាផ្អែមឡែមៗផងដែរ ។
២.៧ សូកូឡា.ស (White Chocolate)
សូកូឡាស មានសារធាតុកាកាវប័រ ប៉ុន្តែគ្មានកាកាវដែលជាប្រភេទប្រេងនិងមានធាតុផ្សំ
ដូចជាស្ករ, កាកាវប័រ, ទឹកដោះគោសុទ្ធនិងដាក់ក្លិនវ៉ានីឡា ។ វាងាយបាក់ បើជាសូកូឡា-សក្លែងក្លាយធ្វើពីប្រេងធុញ្ញជាតិ
មិនមែនកាកាវប័រ ។
២.៨ សូកូឡារាវ (Liquid Chocolate)
សូកូឡារាវ ជាសូកូឡាគ្មានរសជាតិផ្អែម
ភាគច្រើនត្រូវបានច្រកដបលក់ ចំណុះ 1 ដប 1 អោនស៍ និងដោយសារវាមិនរលាយ
ទើបងាយស្រួលក្នុងការប្រើប្រាស់ ដោយផលិតឡើងសម្រាប់ធ្វើនំដុត ។
២.៩ សូកូឡាគូវេចឺរ
(Couverture
Chocolate)
សូកូឡាប្រភេទនេះមានសណ្ឋានពិសេសគឺរលោង តាមធម្មតាមានជាតិផ្សំរបស់កាកាវប័រយ៉ាងហោចណាស់
៣២% ធ្វើឲ្យវាអាចរក្សាសមាសភាគនៅក្នុងប្រភេទប្រេងបានល្អជាប្រភេទលាបសម្បក។
តាមធម្មតាត្រូវបានប្រើប្រាស់តែនៅក្នុងហាងនំប៉ុណ្ណោះ ភាគច្រើនតែងតែប្រទះឃើញនៅក្នុងប្រភេទលាបសម្បកផ្លែឈើ
ឬរុំស្នូលសូកូឡា ។
២.១០ សូកូឡាកាណាច (Ganache Chocolate)
សូកូឡាប្រភេទនេះមានរសជាតិល្វីងខ្លាំង មានការនិយមធ្វើជានំសូកូឡា
។ វិធីធ្វើកាណាច គឺចាក់វីបពីងគ្រីមដែលក្ដៅឧណ្ហៗចូលសូកូឡាចិញ្ច្រាំដែលមានចំណុះស្មើគ្នា
ហើយទុកចោលទាល់តែសូកូឡារលាយ រួចកូរឲ្យសព្វ យើងនឹងទទួលបានល្បាយខាប់ អាចដាក់ប័របន្តិចដើម្បីបន្ថែមជាតិរលោងឲ្យវា
។
២.១១ នំខ្ចប់ដោយសូកូឡា
(Confectionery Coating Chocolate)
នំខ្ចប់ដោយសូកូឡាជាសូកូឡាសម្រាប់ប្រឡាក់ស្ករគ្រាប់
ដោយយកទៅលាយនឹងស្ករ, ទឹកដោះគោម្សៅ ប្រេងធុញ្ញជាតិនិងគ្រឿងផ្សំផ្សេងៗដែលមានពណ៌ចម្រុះ
។
ស្ករគ្រាប់ដែលទទួលបាននេះ ម្សៅកាកាវនឹងមានជាតិខ្លាញ់ទាប
ប៉ុន្តែគ្មានសារជាតិកាកាវប័រ ដូចប្រភេទដទៃទៀត ទើបអាចញែកចេញជាប្រភេទមួយទៀតបាន ។
៣.សារធាតុចិញ្ចឹម
តម្លៃអាហារូបត្ថម្ភក្នុង ១០០ ក្រាម
|
||
ឈ្មោះ
|
ទម្ងន់
|
ភាគរយ
|
ថាមពល
|
540 kcal
|
|
កាបូអ៊ីដ្រាត
|
59.4 g
|
|
ជាតិស្ករ
|
51.5 g
|
|
ជាតិសរសៃ
|
3.4 g
|
|
ជាតិខ្លាញ់
|
29.7 g
|
|
ប្រូតេអ៊ីន
|
7.6
|
|
វីតាមីន
|
||
វីតាមីន A
|
195 IU
|
9%
|
វីតាមីន B1
|
0.1 mg
|
25%
|
វីតាមីន B2
|
0.3 mg
|
25%
|
វីតាមីន B3
|
0.4 mg
|
3%
|
វីតាមីន B6
|
0.0 mg
|
0%
|
វីតាមីន B9
|
12 μg
|
3%
|
វីតាមីន B12
|
0.7 μg
|
29%
|
ក្លរីន
|
46.1 mg
|
9%
|
វីតាមីន C
|
0 mg
|
0%
|
វីតាមីន E
|
0.5 mg
|
3%
|
វីតាមីន K
|
5.7 μg
|
5%
|
ធាតុរ៉ែ
|
||
កាល់ស្យូម
|
189 mg
|
19%
|
ជាតិដែក
|
2.4 mg
|
18%
|
ម៉ាញេស្យូម
|
63 mg
|
18%
|
ម៉ង់ហ្គាណែស
|
0.5 mg
|
24%
|
ផូស្វ័រ
|
208 mg
|
30%
|
ប៉ូតាស្យូម
|
372 mg
|
8%
|
សូដ្យូម
|
79 mg
|
5%
|
ស័ង្កសី
|
2.3 mg
|
24%
|
ធាតុផ្សំផ្សេងទៀត
|
||
ទឹក
|
1.5 g
|
|
theobromine
|
205 mg
|
|
cholesterol
|
23 mg
|
|
រង្វាស់ចំណុះ
|
||
μg = ម៉ៃក្រូក្រាម
mg = មីលីក្រាម
IU = ខ្នាតសកល
|
||
ប្រភពឯកសារនិងរូបភាពៈវេបសាយបរទេស
No comments