វត្ថុមង្គល 44 ប្រភេទតាមជំនឿរបស់ជនជាតិចិន

១.ព្រះញញឹម ឬ តាកំប៉ោង

ព្រះញញឹម ឬ តាកំប៉ោង ជានិមិត្តរូបនៃទ្រព្យសម្បត្តិសេចក្តីសុខនិងភាពសម្បូរហូរហៀរ ។ ជាព្រះធាត់ មានទឹកមុខញញឹមញញែម ដុះក្បាលពោះស្អុយ មានកាយវិការច្រើនប្រភេទ ដែលកាយវិការនីមួយៗសុទ្ធតែមានមង្គលបញ្ជាក់ពីភាពសម្បូរសប្បាយ សិរីសួស្តីរួមផ្សំដែរ ។

មានជំនឿថា បុគ្គលណាគោរពព្រះញញឹមនឹងមានសិរីមង្គល ដែលមានន័យដល់ភាពសម្បូរហូរហៀរដោយទ្រព្យសម្បត្តិនិងសេចក្តីសុខ ព្រោះលោកជាព្រះអ្នកមាន ។ អ្នកខ្លះមានជំនឿថា ឲ្យអធិដ្ឋានអង្អែលពោះលោកមួយថ្ងៃម្តងនឹងធ្វើឲ្យមានសំណាង សមបំណងប្រាថ្នានិងមានកូនចៅក្លាយជាបណ្ឌិតបញ្ញវន្ត ។

២.ហុក ឡុក ស៊ីវ (លាភ ទ្រព្យ អាយុ)

ហុក ប្រែថា លាភសក្ការៈ សេចក្តីសុខដែលកើតឡើងដោយសារបានសមបំណងប្រាថ្នា ។

ទេពហុកជាបុរសងូវហេង មានរស្មីចែងចាំង តុងតែងខ្លួនឆើតឆាយ ដៃម្ខាងកាន់គម្ពីរយូអ៊ី ទ្រនង់ធ្វើអំពីយក់ (គម្ពីរសមបំណងប្រាថ្នា) ជារបស់វិសេស អ្នកណាអធិដ្ឋានអ្វីគឺឲ្យសមបំណងប្រាថ្នា ឬ បានលាភសក្ការៈតាមការសុំពរ ។

ឡុក ប្រែថា មានបាន ឬ ទ្រព្យសម្បត្តិ ។

ទេពឡុក ជាគហបតី ដៃម្ខាងកាន់បញ្ជីឈ្មោះកូនបំណុល ( ព្រោះមានទ្រព្យសម្បត្តិច្រើនមហាសាល ទើបមានកូនបំណុលច្រើន) ដៃម្ខាងទៀតបីកូនប្រុស នៅក្នុងដៃកូនប្រុសគឺមាស និងអាចមានកូនស្រីឱបជើង ដោយក្នុងដៃកូនស្រីមានគ្រឿងលម្អ ផ្កាភ្ញី នំនែក ដែលបង្ហាញពីភាពមានហូបមានចុកគ្រប់គ្រាន់ ។

តាមជំនឿបូរាណ ឡុក ដែលពេញលក្ខណៈគឺត្រូវតែមានកូនប្រុស ពីព្រោះជនជាតិចិនប្រកាន់រឿងបន្តពូជពង្សវង្សត្រកូល បើមានតែទ្រព្យ ប៉ុន្តែគ្មានកូនប្រុសបន្តវង្សត្រកូលក៏ពុំមានប្រយោជន៍ដែរ ។

ស៊ីវ ប្រែថា អាយុយឺនយូរ ។

ទេពស៊ីវ ជាបុរសចាស់អត់សក់ (ក្បាលត្រងោល) ថ្ងាសប៉ោង ពុកចង្កាពណ៌ស ដៃម្ខាងកាន់ផ្លែប៉េះដែលជាផ្លែឈើសួគ៌ នរណាបានទទួលនឹងមានអាយុវែង ដៃម្ខាងទៀតកាន់ឈើច្រត់ក្បាលនាគរាជ (សត្វនៅក្នុងរឿងនិទានដែលមានអាយុដល់ទៅរាប់ម៉ឺនឆ្នាំ) ក.ឈើច្រត់ព្យួរឃ្លោកថូ ដោយឃ្លោកនោះដាក់ថ្នាំអមតៈ ចំណែក-កឃ្លោកចង សៀនជឺ (សៀនជឺគឺគម្ពីរថ្នាំទេវតា ឬ គម្ពីរអាយុវឌ្ឍនៈ) ។

ស៊ីវ មានសត្វក្រសារ (ក្រសារទេព) ជាយានជំនិះ ។

ហុក ឡុក ស៊ីវ មាន ហុក ជាមេក្រុម ចំណែក ឡុក និង ស៊ីវ ជាបរិវារ ដែលមានជំនឿថាមាន ឡុក និង ស៊ីវ ទើបមាន ហុក នោះគឺត្រូវមានអាយុយឺនយូរនិងមានទ្រព្យសម្បត្តិ ទើបរកសេចក្តីសុខឃើញ ។

ការតាំង ហុក ឡុក ស៊ីវ ដែលត្រឹមត្រូវគឺត្រូវដាក់ ហុក នៅកណ្តាល ។

៣.គួនអុី

គួនអុី ជាអាទិទេពនៃភាពស្មោះត្រង់ កត្តញ្ញូ ជាទីខ្លាចក្រែងរបស់ខ្មោចព្រាយបិសាច ។

គួនអ៊ី ដើមឡើយមានឈ្មោះថា ហុនទៀង ជាអ្នកស្រុកហតាំងកៃ មានកម្ពស់ជិត 2 ម៉ែត្រ បបូរមាត់ក្រហម មុខក្រហម ចិញ្ចើមដូចដង្កូវទឹក ភ្នែកពណ៌ខៀវចាស់ មានកាំបិតវែងជាអាវុធ ។ គួនអ៊ី ជាមនុស្សល្អ មានគុណធម៌ ស្មោះត្រង់ កត្តញ្ញូដឹងគុណ ។

មានតំណាលថា បើមានបុគ្គលណាមានគំនិតមិនស្មោះត្រង់ ពេលបានជួប បានឃើញ ឬប្រសព្វភ្នែកនឹងទេពគួនអ៊ី នឹងរអៀសចិត្ត មិនហ៊ានមានគំនិតអាក្រក់ ទើបស័ក្តិសមយ៉ាងខ្លាំងសម្រាប់អ្នកដែលមានបរិវារនៅក្រោមបង្គាប់បញ្ជា គួរគោរពបូជាដើម្បីជាសិរីមង្គល ។

៤.ចាយសៀងអុី

ចាយសៀងអុី ជាអាទិទេពនៃលាភសក្ការៈ ឬ អាទិទេពនៃទ្រព្យសម្បត្តិ ជាទីនិយមរបស់អ្នកប្រកបរបររកស៊ីជនជាតិចិនតាំងយូរលង់មកម្ល៉េះ ។ ក្រៅពីមានអានុភាពនៅក្នុងការនាំលាភសក្ការៈ ទ្រព្យសម្បត្តិ ភាពមានបាន គង់វង្សមកឲ្យអ្នកគោរពបូជាហើយ ចាយសៀងអ៊ី ក៏ជាអាទិទេពពាក់មុខហ៊ី បើជារូបចម្លាក់គឺមានពីរអង្គ មានចម្លាក់បែបគ្រប់ឈុត គឺមន្ត្រីនិងអ្នកចម្បាំង ។

អង្គចម្បាំងមានមុខកាច ជួនកាលគង់លើខ្នងខ្លា ឬឈរជាន់ខ្លា ហត្ថាកាន់ដំបង ចំណែកអង្គមន្ត្រីមានមុខមាត់ល្អ មានពុកមាត់ ។ មានជំនឿថាអង្គចម្បាំងឲ្យគុណរឿងបំណុលដែរគឺជួយទារបំណុលឲ្យអ្នកគោរពបូជា កូនបំណុលមិនហ៊ានកេងប្រវ័ញ្ច ។

៥.ជីកុង

ជីកុុងជាព្រះអរហន្តដែលចូលចិត្តជួយសង្គ្រោះសត្វលោក ជាព្រះស្រស់ស្រាយ មានព្រលឹងព្រលះ មានមុខមាត់កំប្លុកកំប្លែង រួសរាយ មិនកាន់សីល មិនហូបបួស ចូលចិត្តផឹកស្រា ទើបមានឃ្លោកស្រានៅជាប់នឹងខ្លួនលោកជានិច្ច ហើយដៃម្ខាងកាន់ផ្លិតធ្វើពីស្លឹកត្នោត ជួនកាលក៏យួរស្បែកជើងម្ខាង ម្ខាងទៀតពាក់ ។

មានជំនឿថាលោកចូលចិត្តជួយអ្នកដែលមានសមត្ថភាពនៅក្នុងរូបភាពប្លែកៗដែលស្មានមិនដល់ ។

៦.ចុងឃុយ ឬ ចេងឃុយ

អាទិទេពបង្ក្រាបបិសាច ជាអាទិទេពបង្ក្រាបបិសាចទាំងពួង ។

មានតំណាលថា ចុងឃុយ ជាអ្នកបង្ក្រាបបិសាចដែលព្រះចៅថាងស្វៀនយល់សប្តឃើញ ហើយឲ្យអ៊ូតាវជឺ វិចិត្រករគូររូបតាមការរៀបរាប់ ពេលមកប្រាប់ព្រះចៅថាងកៅជូ (ព្រះបិតារបស់ព្រះចៅថាងស្វៀន) បានប្រោសមេត្តាព្រះប្រទានឈុតពណ៌ទឹកប្រាក់និងរៀបចំពិធីបុណ្យសពអ្នកដែលធ្លាក់ពីជណ្តើរស្លាប់ បន្ទាប់ពីតូចចិត្តដោយសារប្រលងមន្ត្រីមិនជាប់ ទើបតាំងចិត្តកម្ចាត់ខ្មោចព្រាយនិងរបស់អពមង្គលឲ្យ ដូច្នេះហើយនៅថ្ងៃទី5 ខែ5 គឺជាថ្ងៃដោះលែងខ្មោច (ទួនអ៊ូជា) ទើបនាំគ្នាព្យួរទេពចុងឃុយតាមជញ្ជាំងផ្ទះ ។

មានជំនឿថាអ្នកណាខ្លាចនឹងត្រូវអំពើ ត្រូវមានចុងឃុយឃុំគ្រងនៅក្នុងផ្ទះ ឬករណីត្រូវចូលមន្ទីរពេទ្យ ឬ អ្នកជំងឺទៅសម្រាកនៅកន្លែងណាមួយ កន្លែងដែលថានោះចាត់ទុកថា វាស្មោកគ្រោក គឺមានមនុស្សស្លាប់ច្រើន ច្បាស់ជាមានខ្មោចនៅ ឲ្យយកទេពចុងឃុយទៅជាមួយហើយនឹងមានសុវត្ថិភាព ជាពីជំងឺ ត្រលប់ទៅផ្ទះវិញបាន ។

៧.យិន-យ៉ាង

យិន-យ៉ាង មានសណ្ឋានជារង្វង់មូលខ្មៅពាក់កណ្តាលសពាក់កណ្តាល នៅក្នុងពណ៌ខ្មៅមានចំណុចស នៅក្នុងពណ៌សមានចំណុចខ្មៅដូចភ្នែកត្រី ធ្វើឲ្យមើលទៅដូចត្រីសខ្មៅពីក្បាលបញ្រ្ចាសក្បាលគ្នា ។

អត្ថន័យពណ៌ខ្មៅជាយិន-មនុស្សស្រី ភាពខ្មៅងងឹត ផែនដី ព្រះចន្ទភាពទន់ជ្រាយ (ស្រស់ស្អាត) និងឯកា រីឯពណ៌សជាយ៉ាង-មនុស្សប្រុស ភាពសស្អាត ផ្ទៃមេឃ (ឋានសួគ៌) ព្រះអាទិត្យ ភាពរឹងមាំ (កម្លាំងពលំ) ។

គូយិន-យ៉ាងនេះជានិមិត្តរូបរបស់ជីវិតដែលមានពីរផ្នែកជានិច្ច ទើបត្រូវយកមកធ្វើជាកម្លាំងមង្គលនៅក្នុងការបន្ថែមនិងសម្រួលហុងស៊ុយបានល្អ ។

៨.ឃ្លោកថូ

ឃ្លោកថូ ជានិមិត្តរូបពេទ្យទេវតា ឬ ពេទ្យបូរាណ ។ ជនជាតិចិនតែងតែយកមកព្យួរក្នុងបន្ទប់ក្មេងៗ ឬ មនុស្សចាស់ ព្រោះមានជំនឿថាពេទ្យទេវតាបានមកនៅក្នុងបន្ទប់ ធ្វើឲ្យមានសុខភាពរឹងមាំ ក្មេងៗមិនង៉ិកង៉ក់និងគ្មានខ្មោចព្រាយមករំខាន ។

ក្រៅពីនេះផ្លែឃ្លោកជារុក្ខជាតិដែលមានគ្រាប់ច្រើន មានដើមវែងនិងចេញផ្លែផ្កាមិនចេះអស់ ប្រៀបដូចមនុស្សម៉ឺនជំនាន់ ។ ប្រើបង្ហាញដល់ភាពមង្គលឲ្យមានអាយុយឺនយូរ សុខភាពរឹងមាំ មានកូនមានចៅពេញផ្ទះ ។

៩.ជួង

ជួង ជានិមិត្តរូបមង្គលខាងសាសនា មានន័យដល់ការភ្ញាក់និងការដឹង ។

សំឡេងជួងធ្វើឲ្យភ្ញាក់ពីការលង់ក្នុងកិលេសតណ្ហា ឲ្យភ្ញាក់រលឹកនិងដឹងពីសច្ចធម៌ពិតប្រាកដ ។ មានជំនឿទៀតថាសំឡេងជួងនឹងនាំតែដំណឹងល្អនិងរឿងមង្គលមកឲ្យ ថែមទាំងឲ្យប្រផ្នូលដល់ល្បិលកលរបស់សត្រូវ គូប្រជែងទៀតផង ។

១០.កាក់ចិនបូរាណ

កាក់ចិនបូរាណ ជានិមិត្តរូបដែលបញ្ជាក់ពីទ្រព្យសម្បត្តិ មានប្រាក់កាសច្រើនសន្ធឹកសន្ធាប់ ។

ជនជាតិចិនបូរាណប្រកាន់ថាជារបស់មួយក្នុងចំណោមរបស់មង្គលនៃទ្រព្យសម្បត្តិបូរាណ ជារបស់នាំលាភសំណាងមកឲ្យ ទើបតែងតែស្លាក់ពាក្យសិរិមង្គលលើកាក់ដែលប្រែថាឲ្យមានសិរិមង្គល សមបំណងប្រាថ្នា ឬ មាសប្រាក់ពេញផ្ទះ ឬ កាក់ត្រានៃសេចក្តីចម្រើនរុងរឿង ។

១១.គម្ពីរមង្គល (យូអុី)

គម្ពីរមង្គល ជានិមិត្តរូបនៃភាពសមបំណងប្រាថ្នា ជាគ្រឿងឥស្សរិយយសជាន់ខ្ពស់សម្រាប់ចក្រពត្តិ មន្រ្តីជាន់ខ្ពស់និងព្រះសង្ឃចិនឋានៈខ្ពស់ទុកប្រើធ្វើពិធី ចំណែកក្បាលរបស់គម្ពីរជារាងបន្ទះ កោងៗដែលមកពីភិនភាគត្រង់ក្បាលផ្សិតលីងជឺ ដែលជនជាតិចិនបូរាណមានជំនឿថាមានអត្ថប្រយោជន៍ជាថ្នាំអាយុវែង នរណាបានទទួលទាននឹងមានជីវិតជាអមតៈ និងចាត់ទុកថាជារុក្ខជាតិមង្គលមួយប្រភេទ ។

គម្ពីរយូអ៊ីអាចធ្វើពីភ្លុកដំរី, យក់, ថ្ម ដើមឫស្សីនិងលោហៈ ។ បើធ្វើពីយក់ហៅថា ងេកយូអុី (ងេក ប្រែថា យក់ យូអ៊ី ប្រែថា សមបំណង) ។

គម្ពីរយូអ៊ីនៅមានរបស់វិសេសដែលព្រះពោធិសត្វនិងទេពហុក (ហុក ឡុក ស៊ីវ) កាន់ទៀតផង ព្រោះ ហុក គឺសេចក្តីសុខ សុខដែលកើតមកពីការបានសមបំណងគ្រប់រឿង ទើបមានជំនឿថានិមិត្តរូបយូអ៊ីនេះនឹងនាំភាពសមបំណងប្រាថ្នាមកឲ្យ ។

១២.នាគ

នាគ ជានិមិត្តរូបនៃអំណាចសក្តានុពល ភាពធំសម្បើម មនុស្សភេទប្រុស ចក្រពត្តិ ប្រទេសជាតិ ។

នាគចាត់ទុកជាសត្វសំខាន់បំផុតរបស់ចិននិងកើតពីភិនភាគសត្វ៥ប្រភេទ រួមមានស្នែងក្តាន់ ក្បាលគោ ខ្លួនពស់ ស្រកាត្រី ក្រញាំស្ទាំង តែតម្រាខ្លះនិយាយថា នាគមានប្រភពមកពីសរីរាង្គរបស់សត្វ 9 ប្រភេទគឺ ស្នែងក្តាន់ ក្បាលអូដ្ឋ ភ្នែកបិសាច ក-ពស់ ពោះងាវ ស្រកាត្រីគល់រាំង ឬ ត្រីកាហោ ក្រចកឥន្រ្ទី ឬ ស្ទាំង បាទជើងខ្លា ក្បាលគោ ដែលសំខាន់មានពុកមាត់លូតចេញមកតិចៗ ប្រើពេលវេលា 500 ឆ្នាំ បើសិនអាយុ 1,000 ឆ្នាំនឹងមានស្លាបដុះចេញមកហោះហើរបានទៀតផង ។

នៅក្នុងមាត់នាគចិនមានត្បូងគជ់ ជាគជ់វិសេសដែលពង្រីកពង្រួម ធ្វើភ្លឺងងឹតបាន សម្រាប់ហៅខ្យល់ ភ្លៀង បង្ក្រាបបិសាច សម្រាប់សម្តែងអំណាចនិងភាពមហាសាល ។ នាគជាសត្វទេព ទើបហោះហើរដើរលើអាកាស ហែលទឹក ជ្រែកដីបាន ។

ការយកនិមិត្តរូបនាគមកប្រើមិនថាជាគំនូរ ចម្លាក់ឬគ្រឿងលម្អរបស់របរប្រើប្រាស់ បើសិនជារបស់ចក្រពត្តិ នាគមានក្រចក៥ របស់មន្ត្រីមានក្រចក៤ បើបុថុជ្ជនមានក្រចក៣តែប៉ុណ្ណោះ ។

តាមតំណាលចិនជាសត្វមង្គលបំផុត ជារាជានៃសត្វមានស្រកាទាំងពួង ជាតំណាងនៃភាពរឹងមាំ ភាពស្រស់ស្អាត ការតាំងចិត្ត ការឧស្សាហ៍ព្យាយាម ភាពក្លាហាន និង អត់ធ្មត់ ទើបជនជាតិចិនជឿថានាគគឺ ចិត្តវិញ្ញាណនៃការផ្លាស់ប្តូរនិងស្រោចស្រង់ឲ្យល្អប្រសើរ ហើយនាគក៏ជាអ្នកនាំភ្លៀងនៃជីវិតមកឲ្យ ។

ភិនភាគរបស់នាគស័ក្តិសមនឹងអ្នកដែលកើតឆ្នាំរកាដែលមានជំនឿថា ប្រែកាឡាមកពីសត្វហង្សជាមិត្តជិតស្និទ្ធនឹងនាគ ។

១៣.ហង្ស

ហង្ស ជានិមិត្តរូបរបស់រាជិនី ភាពស្រស់ស្អាត មនុស្សភេទស្រី និង ការចាប់ផ្តើម ឬ ការមានជីវិតថ្មីដែលល្អប្រសើរ ។

ហង្សជាសត្វនៅក្នុងតំណាលដូចនាគនិងឈីលីន មានសរីរាងរបស់បក្សីមង្គល៥ប្រភេទផ្សំគ្នាគឺក្បាលមាន់ទេព មាត់សារិកាកែវ ខ្លួនទាម៉ែតដារីន រោមក្រសា និង កន្ទុយក្ងោក ។

ហង្សជាសត្វដែលធំបំផុតនៅក្នុងចំណោមបក្សីនទាំងអស់មាន៥ប្រភេទគឺ រោមក្រហម រោមស្វាយ ពណ៌ខៀវ រោមលឿងនិងរោមស ។ ហង្សញីមានក្បាលពណ៌ក្រហម ហង្សឈ្មោលពណ៌ខៀវ ឬ ពណ៌ទឹកប្រាក់ សំឡេងច្រៀងដូចសំឡេងខ្លុយ មិនស៊ីសត្វល្អិតដែលនៅរស់ មិនចឹកដើមឈើខៀវខ្ចី មិនហើរចោលសម្បុក ពេលហើរទៅណាមកណានឹងមានបក្សីផ្សេងហើរតាម ។

បក្សីនេះញាណដឹងពីហេតុការណ៍លើលោកនេះបាន ប្រាកដខ្លួននៅតែកន្លែងដែលស្ងប់ស្ងាត់ប៉ុណ្ណោះ ទើបបក្សីនេះត្រូវយកមកតំណាងឲ្យសម្រស់និងអំពើល្អ៥ប្រការគឺគុណធម៌ យុត្តិធម៌ សីលធម៌ មនុស្សធម៌និងសច្ចធម៌ រួមទាំងខាងសៃយសាសន៍ហុងស៊ុយក៏ប្រើងហង្ស នៅក្នុងន័យនៃការចាប់ផ្តើមជាថ្មីដែលល្អ ។

១៤.កីលែន (ឈីលីន)

កីលែន និមិត្តរូបនៃវាសនា ភាពគង់វង្ស និង ការពារពីរបស់អពមង្គល ។

កីលែន ជាសត្វមង្គលតាមតំណាល ជួនកាលជនជាតិចិនហៅថា សេះនាគ មានសណ្ឋានរបស់សត្វមង្គល 5 ប្រភេទផ្សំគ្នាគឺក្បាលនាគ ស្នែងយូនីខន ខ្លួនក្តាន់ ស្រកាដូចត្រីកន្ទុយគោ ។ កីលែនចាត់ទុកថាជាសត្វមង្គលដែលពេលប្រាកដខ្លួននីទីណាហើយ មានន័យថាទីនោះនឹងមានរឿងមង្គលកើតឡើងឆាប់ៗ ឬមានតែសំណាងល្អ គ្មានរឿងអាក្រក់ ហើយមានជំនឿទៀតថាការដាក់តាំងកីលែននឹងជួយឃុំគ្រងនិងកម្ចាត់របស់អពមង្គលឲ្យវិនាស ហើយនឹងនាំលាភសំណាង ដំណឹងល្អមកឲ្យ ។

១៥.តោ

តោ ជាសត្វមង្គលមានអំណាចនៅលើដី នាំលោកអ្នកចៀសផុតពីគ្រោះភ័យទាំងឡាយ ។

មានតំណាលខ្លះនិយាយថា តោមិនមែនជាសត្វដែលមានប្រភពនៅប្រទេសចិន តែមាននៅតំបន់អាហ្រ្វិក ។ មានអ្នកដំណើរជនជាតិចិនទៅឃើញក៏ចូលចិត្តខ្លាំងតែមិនអាចយកមកប្រទេសបាន ទើបធ្វើការចងចាំត្រលប់មកបង្កើតរូបភាពតាមការស្រមើស្រមៃ មានសម្រស់ល្អវិចិត្រ រាងកាយធំសម្បើម សំឡេងរោទ៍ឮកងរំពង ត្រូវលើកជារាជានៃសត្វព្រៃទាំងពួង ទើបតោគឺជាទីស្ងើចសរសើរ គោរពបូជាតាំងពីព្រះមហាក្សត្រដល់នាម៉ឺនមន្ត្រី និងនិយមដាក់តាំងតោគូនៅមុខស្ថាប័នសំខាន់ៗដូចជាមុខព្រះបរមរាជវាំង ព្រះវិហារ វត្ត ។

មានតំណាលខ្លះនិយាយថាពេលតោដោយញីដោយឈ្មោល រោមដែលជ្រុះពីខ្លួនរបស់ពួកវាក្លាយជាដុំមូលៗ ហើយក្រោយមកក៏មានកូនតោចេញពីដុំមូលៗនោះទើបយើងឃើញរូបចម្លាក់តោឈ្មោលជាន់កូនបាល់ តោញីជាន់កូន ។

ជនជាតិចិនជឿថា ការតាំងតោនៅមាត់ទ្វារ ឬ ក្បាលសសរ គឺបង្ហាញពីអំណាច គួរឲ្យកោតខ្លាច ព្រោះតោជាសត្វទេពមង្គល ពិសេសតោបៃតងជាយានជំនិះរបស់ទេព វិនស៊ូភូសា ក្នុងពុទ្ធសាសនាមហាយាន ដូច្នេះហើយទើបតោជានិមិត្តរូបនៃការការពារ ឃុំគ្រង និង មានអំណាចកម្ចាត់ព្រាយបិសាចឲ្យស្ថាប័ននោះបានយ៉ាងប្រសើរ ។

១៦.គីង្គក់ជើងបីពាំកាក់

គីង្គក់ជើងបីពាំកាក់ មានឈ្មោះមួយទៀតថា គីង្គក់សួគ៌ ជាសត្វនាំលាភ មានមង្គល មានន័យដល់លាភសក្ការៈ មាសប្រាក់ អាយុយឺនយូរ ភិនភាគដូចគីង្គក់ តែមានជើងបី មាត់ពាំកាក់ ។

តាមតំណាលនិយាយថា សាច់គីង្គក់ជាថ្នាំអាយុវឌ្ឍនៈ បរិភោគហើយជួយឲ្យជាពីរោគាព្យាធិនិងក្លាយជាអមតៈ ទើបគីង្គក់សួគ៌ត្រូវចាប់បរិភោគ រហូតដល់លើកក្បួនភៀសខ្លួនចោលស្រុកចោលស្រែទៅនៅឋានព្រះចន្ទ ។ មានបុរសម្នាក់ឈ្មោះឡៅហៃជាជនដែលមានសំណាងល្អបានជួបគីង្គក់សួគ៌ហើយយកមកចិញ្ចឹមមើលថែ ទើបធ្វើឲ្យមានសំណាង ដែលធ្លាប់លំបាកតោកយ៉ាកក៏ក្លាយជាអ្នកមាន ។

ជនជាតិចិនជឿថា គីង្គក់សួគ៌ជាសត្វមង្គលដែលនាំភាពមានបាន មានលាភ មានជោគ និង អាយុវែងមកឲ្យ ។

១៧.ក្តាន់

ក្តាន់ជានិមិត្តរូបរបស់ទេពឡុក (ហុក ឡុក ស៊ីវ) ដែលមានន័យដល់យសស័ក្តិ ភាពមានបាន ទ្រព្យសម្បត្តិ រុងរឿង អាយុវែង ។

ក្តាន់ជាសត្វដែលមានអាយុវែងណាស់ ក្តាន់ប្រផេះមានអាយុ 100 ឆ្នាំ ក្តាន់ខ្មៅមានអាយុ 1,500- 2,000 ឆ្នាំ ហើយក៏ប្រទះឃើញថាក្តាន់ត្រូវប្រើនៅក្នុងពិធីបូជាយញ្ញដើម្បីភាពអមតៈ ដូច្នេះហើយទើបជនជាតិចិនមានជំនឿថា រូបគំនូរ ឬ រូបចម្លាក់ក្តាន់ នាំរឿងមង្គលដែលមានអាយុកាលយូរអង្វែង ទាំងយសស័ក្តិ ភាពរុងរឿង ភាពមានបាន និង សុខភាពល្អមកឲ្យដោយគ្មានថ្ងៃបញ្ចប់ ។

១៨.អណ្តើកនាគ

អណ្តើកនាគជានិមិត្តរូបនៃភាពរឹងមាំ អាយុវែង សុខភាពល្អ តាំងចិត្ត ខិតខំប្រឹងប្រែង នាំទៅរកភាពរីកចម្រើន ភាពជោគជ័យគង់វង្សយូរអង្វែង និងរួមដល់ការបន្ថែមផ្នែកទ្រព្យសម្បត្តិ និងការពារឃុំគ្រងពីរឿងអពមង្គល ។ អណ្តើកនាគជាសត្វទេពដែលមានអំណាច ជាទីសទ្ធាដ៏ខ្ពង់ខ្ពស់របស់រាជវង្សថាង ។ បឋមក្សត្រនៃរាជវង្សថាងបានសាងសង់បដិមាអណ្តើកនាគនៅមុខរាជវាំង និងជាជំនឿតៗគ្នារបស់ជនជាតិចិន ព្រោះមានជំនឿថាអណ្តើកនាគជាកូនទី៩របស់ស្តេចនាគដែលកើតមកជាអណ្តើកក្បាលនាគ ។

តាមអត្ថន័យ អណ្តើកតំណាងឲ្យភាពរឹងមាំ អត់ធ្មត់ មានក្រោះការពារពីភាពអន្តរាយ ចំណែកនាគគឺភាពធំសម្បើមភាពវិចិត្រ ភាពក្លាហាន វាសនាបុណ្យបារមីខ្ពង់ខ្ពស់ ទើបចាត់ទុកជាមង្គលដ៏ខ្ពង់ខ្ពស់ ពេលសត្វមង្គលទាំងពីរមកផ្សំគ្នាដែលជាប្រាថ្នាដ៏ខ្ពង់ខ្ពស់បំផុតរបស់ជនជាតិចិនបូរាណនិងជាជំនឿមកដល់សព្វថ្ងៃ ។

១៩.ត្រី (ហឺ ឬ អុី)

ត្រីជានិមិត្តរូបនៃការមានទ្រព្យសម្បត្តិច្រើនអនេក បានកម្រៃបានផលប្រយោជន៍ ។ ភាសាចិនតៀជីវ ហឺ ជាពាក្យសទិសសូរប្រែថា ច្រើនគរគោក ទុកសម្រាប់បង្ហាញពីអត្ថន័យមង្គល ឲ្យមានរបស់មានរបរដែលត្រូវការច្រើន សម្បូរចុកសម្បូរចាយ មិនខ្វះខាតនិងសំណាងល្អ បើត្រីមាសគឺមាន័យដល់មាសនិងយក់ពេញផ្ទះ បើជាត្រីលឺហឺ ឬ លីវី គឺមានន័យដល់ភាពជោគជ័យ ។

មានតំណាលថា បើត្រីលីហឺ ណាអាចហែកមកដល់ទ្វារនាគដែលជាមាត់ផ្លូវឋានសួគ៌ ហើយផ្លោះចូលទៅខាងក្នុងបាននឹងក្លាយជា ត្រីនាគ ដែលជាផ្នត់គំនិតបង្រៀនជនជាតិចិនថា ជនជាតិចិនមានសិទ្ធិក្លាយជាអ្នកមានបាន បើមានចិត្តមោះមុតនិងព្យាយាមដូចត្រីលីហឺ ដែលប្រឹងប្រែងហែលមកដល់ទ្វារផ្លូវឋានសួគ៌ និងប្រើការព្យាយាមអស់ពីសមត្ថភាពដើម្បីឲ្យបានចូលទ្វារនាគបានសម្រេច ដែលនឹងបានក្លាយជាត្រីដែលមានកិត្តិយសថ្លៃថ្នូរ ។ បើត្រីណាមួយផ្លោះមិនបានគឺនៅតែជាត្រីលីហឺ ដូចដើម ទើបនិយមប្រើត្រីលីហឺ ជំនួសពាក្យជូនពរថា សូមឲ្យមានភាពជោគជ័យនៅក្នុងជីវិតនិងមានប្រើប្រាស់គ្រប់គ្រាន់ ។

២០.ទាម៉ែតដារីន

ទាម៉ែតដារីន ជានិមិត្តរូបនៃការមានជីវិតគូដែលមានសេចក្តីសុខ ការរៀបមង្គលការ ។

តាមធម្មជាតិរបស់ទាម៉ែតដារីន គឺរស់នៅជាគូជានិច្ច ទើបត្រូវយកទៅជូនពរកូនកំលោះកូនក្រមុំឲ្យជីវិតគូមានសុភមង្គលនិងស្មោះត្រង់ចំពោះគ្នា ទើបមានជំនឿថា ការប្រើនិមិត្តសញ្ញាគូគឺមង្គលដ៏ប្រសើរនៃការសមបំណងក្នុងរឿងស្នេហា ។

២១.សេះ

សេះ ជានិមិត្តរូបនៃភាពរហ័សរហួន រវៀសរវៃ រឹងមាំ មិនចេះនៅមួយកន្លែង ការដើរហើរ ដំឡើងតំណែង ។

ជនជាតិចិនមានជំនឿថា ការតាំងសេះ ៣ ក្បាលអាចកែខៃការបែកខ្ញែកបាន ឬ រូបគំនូរសេះ ៨ ក្បាល ៨ ឥរិយាបថដើម្បីបន្ថែមភាពរីកចម្រើនរុងរឿងផ្នែកជំនួញ បានសម្រេចក្នុងពេលដ៏ឆាប់រហ័ស ។

សេះក៏ជានិមិត្តរូបនៃពាក្យជូនពរឲ្យមានសុខភាពល្អរឹងមាំទៀតផង។

២២.ជ្រូក

ជ្រូក ជានិមិត្តរូបនៃការប្រលងជាប់ គ្រប់រឿងគឺមានភាពងាយស្រួល សម្បូរសប្បាយ ហូបចុកឆ្អែត ដេកលក់ស្កប់ស្កល់ ។

ជនជាតិចិនមានជំនឿថា ការជូនពរដោយប្រើរូបជ្រូក មានន័យដល់ការប្រលងជាប់ ចំណែកពាក្យ ហួន ប្រែថា ជ្រូកព្រៃមានន័យដល់ភាពសប្បាយរីករាយ ប្រើជំនួសន័យ សប្បាយចិត្តឥតឧបមា ។ តម្រាខ្លះជឿថា ជ្រូកជានិមិត្តរូបនៃភាពសម្បូរសប្បាយ នៅក្នុងរឿងមានហូបមានចុក មានប្រើប្រាស់ជារៀងរហូត ហូបឆ្អែត ដេកលក់ស្កប់ស្កល់ សប្បាយចិត្តព្រោះគ្រប់រឿងដែលលំបាកនឹងក្លាយជាងាយស្រួល ។

២៣.ពីសៀ (ភីស៊ីវ ឬ ភេយ៉ាវ)

ពីសៀ ជានិមិត្តរូបនៃសត្វនាំសំណាង ការពារនិងកម្ចាត់របស់អពមង្គល មានសណ្ឋានស្រដៀងក្តាន់ មានចង្កូម ភ្នែកលៀន មាត់ធំ មានស្នែង កន្ទុយវែង ស្លាបខ្លី តែខ្លះក៏គ្មានស្លាប មានភាពក្លាហាន បើកចំហ ស្មោះត្រង់ចំពោះម្ចាស់ ។

សណ្ឋានរបស់ ពីសៀ ជាការប្រមូលផ្តុំសត្វមង្គល 5 ប្រភេទ 5 ធាតុ គឺមានជើង 4 របស់តោដ៏មានថាមពល (ធាតុមាស) មានស្នែងនិងដងខ្លួនជាក្តាន់ (ធាតុទឹក) មានស្លាបស្តេចបក្សីដ៏រឹងមាំ (ធាតុភ្លើង) មានក្បាលនាគដ៏មានអំណាច (ធាតុឈើ) និង កន្ទុយឆ្មាដ៏ស័ក្តិសិទ្ធិ (ធាតុដី) ។

ដូច្នេះហើយទើបមានជំនឿពាក់ព័ន្ធនឹងភិនភាគរបស់ ពីសៀ ថាក្រញាំសង្គ្រប់ប្រាក់ ងើបក្បាលកំហែងសត្រូវ គូប្រជែងហាមាត់ធំៗទទួលទ្រព្យ អណ្តាតកៀវមាសប្រាក់ កន្ទុយវែងបក់នាំលាភ គ្មានរន្ធគូទ ទើបមាសប្រាក់មិនហូរចេញ ។

២៤. ចៀម

ចៀម និមិត្តរូបនៃលាភសំណាង ភាពរុងរឿងនិងភាពជោគជ័យ។ ជនជាតិចិនបូរាណលើកតម្កើងសត្វចៀមជាសត្វមង្គលនិងភាពរុងរឿង ។

មានគំនូរ ឬ ចម្លាក់ចៀម 3 ក្បាល ឪម៉ែកូននិងព្រះអាទិត្យ ។ រូបចៀម 3 ក្បាលបើកទ្វារ ចាត់ទុកថាជាមង្គលនិងការជូនពរ មានន័យដល់លាភសំណាង ភាពជោគជ័យបានវិលមកវិញ ឧបមាដូចរដូវស្លឹកឈើលាស់ ភាពត្រសុំត្រសាយបៃតងខ្ចីក៏ត្រលប់មកវិញ ។

២៥.ទន្សាយ

ទន្សាយជានិមិត្តរូបនៃការឲ្យអំណាច សមត្ថភាព ភាពក្លាហាននិងយុត្តិធម៌ ។

តាមជំនឿរបស់ជនជាតិចិនសម័យបូរាណជឿថា ហ្វូងទន្សាយពណ៌សនៅឋានព្រះចន្ទមានតួនាទីផ្សំថ្នាំអមតៈ ទើបគូរក្បូរក្បាច់មង្គលជាទន្សាយបីក្បាលរត់ដេញគ្នាជារង្វង់ ដោយឲ្យស្លឹកត្រចៀកម្ខាងរបស់ទន្សាយនីមួយៗនៅចំកណ្តាលជាបីជ្រុង ទើបមើលទៅឃើញទន្សាយនីមួយៗមានស្លឹកត្រចៀកទាំងសងខាង ។

ទន្សាយបង្ហាញពីមង្គលនៃការមានអំណាច ក្លាហាននិងយុត្តិធម៌ បើសិនប្រើនិមិត្តរូប ទន្សាយព្រៃ នឹងមានន័យដល់ការមានអាយុវែងដូចក្តាន់ ។

២៦.បង្គា (បង្កង)

បង្កងជានិមិត្តរូបនៃលាភសំណាង ឆ្លងផុតឧបសគ្គ ។

មានជំនឿថាសណ្ឋានរបស់បង្គាធ្វើឲ្យខ្លួនឯងមានកម្លាំងលោតបានឆ្ងាយ គ្មានឧបសគ្គទាំងផ្លូវត្រង់ផ្លូវវៀច ទើបមានន័យដល់ការធ្វើអ្វីបានផលតាមការប្រាថ្នា ឆ្លងផុតឧបសគ្គទាំងឡាយបាននិងសំណាងល្អគ្រប់រឿងគ្រប់រ៉ាវ ។

២៧.សណ្តែកដី

សណ្តែកជាមើមឈើមង្គលម្យ៉ាង ដែលមានរហស្សនាមថាធធញ្ញជាតិនៃភាពយឺនយូរ ។

សណ្តែកអាចលូតលាស់ធំធាត់បានល្អពេលនៅក្នុងដី មានមើមជាចង្កោមដូចទំពាំងបាយជូរ រក្សាទុកបានយូរ មិនស្អុយរលួយ មានរសជាតិឈ្ងុយឆ្ងាញ់និងមានប្រយោជន៍ចំពោះរាងកាយ ទើបសណ្តែកដីត្រូវប្រកាន់យកជានិមិត្តរូបនៃសិរីមង្គល សម្តែងពីភាពលូតលាស់ ថ្លៃថ្នូរនិងភាពយូរអង្វែងស្ថិតស្ថេរចីរកាល ។

២៨.ឫស្សី (ជូ)

ឫស្សី ជានិមិត្តរូបនៃភាពរីកចម្រើន ភាពយឺនយូរ នឹងន អត់ធ្មត់ អាយុវែង ដូចសុភាសិត ដើមឫស្សីមានកម្ពស់ដល់ទៅ 100 ម៉ែត្រ ជីវិតត្រូវដើរទៅមុខមួយជំហាន ។

ឫស្សីជាដើមឈើមង្គល តាមសណ្ឋានរបស់ឫស្សីជាដើមឈើដែលមានផលប្រយោជន៍ច្រើន ងាយដាំ ឆាប់ធំ ឆាប់ដុះទំពាំងនិងមានស្លឹកពណ៌បៃតងពេញមួយឆ្នាំ ។ នៅរដូវរងាក៏មិនក្រៀមស្វិតនិងរេរាតាមខ្យល់ផាត់ ពិសេសសំឡេងរបស់ដើមឫស្សីក្នុងភ្នក់ភ្លើងនោះ ទុកសម្រាប់បណ្តេញខ្មោចព្រាយបិសាច (ជាកំណើតសំឡេងផាវកាំជ្រួច) និងធ្វើឲ្យកើតភាពស្ងប់ត្រជាក់ត្រជុំ ភាសាចិន ពាក្យថា ជូ ប្រែថា ជូនពរ ដូច្នេះហើយទើបដើមឫស្សីកំពូលដើមឈើមង្គលនៃការជូនពរ តាមអត្ថន័យគឺភាពរីកចម្រើនរុងរឿងស្ថិតស្ថេរជានិរន្តរ៍ ។

២៩.ព្រះម៉ែគង់សាអុីម ឬ ព្រះពោធិសត្វគង់សាអុីម (គាន់អុីម)

អាទិទេពនៃក្តីមេត្តាករុណា ជួយសង្គ្រោះសត្វលោក ប្រទានពរតាមការអធិដ្ឋាន ។

៣០.ហួហា

ហួហា ជាព្រះគូ ។ អង្គមួយមានរបស់ទិព្វជាស្លឹកឈូក អង្គមួយទៀតកាន់ដន្លាប់មូល ជាមង្គលឲ្យក្តីស្រលាញ់ចុះសម្រុងគ្នា ។

ផ្ទះណាមានបងប្អូនចូលចិត្តវាយតប់គ្នា ស្វាមីភរិយាឈ្លោះទាស់ទែងគ្នា ឬ កន្លែងធ្វើការមានបុគ្គលិកមិនចុះសម្រុងគ្នា ដាក់តាំងហួហានឹងមានសេចក្តីសុខត្រជាក់ត្រជុំ ។

៣១.ផ្កាមូតាន់

ផ្កាមូតាន់ តំណាងឲ្យទ្រព្យសម្បត្តិ មានកិត្តិយស ភាពខ្ពង់ខ្ពស់ថ្លៃថ្នូរ ។

៣២.ដំរី

ដំរីជាសត្វដែលមានអំណាច កម្លាំងពលំនិងឆ្លៀវឆ្លាត ចាត់ទុកជាសត្វមង្គលដែលជួយនាំភាពជោគជ័យមកឲ្យ ។

៣៣.ខ្លា

ខ្លាជាសត្វសួគ៌ដែលមានអំណាច ទុកការពារខ្មោចព្រាយបិសាចនិងឃុំគ្រងជីវិត ។

៣៤.មាន់

សិរនៅលើក្បាលមានន័យដល់ការមានសតិស្មារតីផ្នែកសិក្សារៀនសូត្រ ខ្នាយនៅនឹងជើងមានន័យដល់ភាពអង់អាចក្លាហាន សញ្ជាតិញាណនៃការការពារខ្លួនភេទស្រី សម្តែងដល់ក្តីមេត្តាករុណា ជនជាតិចិនប្រើជាមង្គលក្នុងរឿងតំណែងមុខងាររាជការនិងទុកការពារភ្លើង ។

៣៥.អណ្តើក

អណ្តើកតំណាងឲ្យអាយុវែង រឹងមាំ អត់ធ្មត់ ។

៣៦.ស្វា

ស្វាជាសត្វតំណាងឲ្យការបានយសបានស័ក្តិ មុខតំណែងខ្ពស់ ។

៣៧.ឆ្កែ

ឆ្កែតំណាងឲ្យអ្នកការពារទ្រព្យសម្បត្តិ ។

៣៨.ទូកក្តោង

តំណាងឲ្យភាពងាយស្រួលប្រាសចាកគ្រោះថ្នាក់និងមាសប្រាក់ហូរចូល ។

៣៩.ផ្លែប៉េះ

តំណាងឲ្យអ្នកកម្ចាត់ខ្មោចព្រាយបិសាចនិងការពារពីរោគធ្យាធិ អាយុយឺនយូរ ។

៤០.មាសដុំ

តំណាងឲ្យទ្រព្យសម្បត្តិ ទទួលបានលាភសក្ការៈ មាសប្រាក់ ។

៤១.អ្នកនេសាទ

អ្នកនេសាទតំណាងឲ្យការបានទទួលកម្រៃច្រើនហូរហៀរ ។

៤២.រៃ

តំណាងឲ្យភាពអមតៈ ការរស់ឡើងវិញ ជានិមិត្តរូបនៃសេចក្តីសុខនិងនៅក្មេងជារៀងរហូត ព្រោះរៃជាសត្វល្អិតមួយប្រភេទដែលមានអាយុវែងដល់ទៅ 17 ឆ្នាំ ហើយជាមង្គលតំណាងឲ្យការប្រឡងជាប់ រៀនពូកែ ភាពជោគជ័យ ។

៤៣.យ័ន្ត 8 ទិស (ប៉ូយគួយ)