គ្រែនប័ររី

គ្រែនប័ររី (English: Cranberry) ជាតិណជាតិ ស្ថិត​ក្នុងពពួក ERICACEAE អម្បូរប័ររី ត្រូវបានដាំជាប្រយោជន៍ផ្នែកពាណិជ្ជកម្មនៅអាមេរិក ។ ផ្លែគ្រែនប័ររីមានពណ៌ក្រហមស្រស់ មានរសជាតិជូរអែម ។

គ្រែនប័ររី
ចំណាត់ថ្នាក់វិទ្យាសាស្រ្ត
អាណាចក្រ	Plantae
(unranked)	Angiosperms
(unranked)	Eudicots
(unranked)	Asterids
លំដាប់	Ericales
អម្បូរ	Ericaceae
ពួក	Vaccinium
ពួករង	Oxycoccus
ប្រភេទ	·           Vaccinium erythrocarpum ·           Vaccinium macrocarpon ·           Vaccinium microcarpum ·           Vaccinium oxycoccos

មាតិកា

១.គុណសម្បត្តិនិងអត្ថប្រយោជន៍

២.តម្លៃអាហារូបត្ថម្ភក្នុង 100 ក្រាម

៣.ប្រភព

១.គុណសម្បត្តិនិងអត្ថប្រយោជន៍

១.១.គុណសម្បត្តិ

-ការពារអញ្ចាញធ្មេញ ។

-ព្យាបាលរបួសក្នុងពោះ ។

-ព្យាបាលប្លោកនោមហើម ផ្លូវទឹកមូត្រហើម ផ្លូវទឹកមូត្រឆ្លងរោគ កម្ចាត់ក្លិនទឹកមូត្របានល្អ ។

-ព្យាបាលនិងបង្ការរោគដែលឆ្លងមកពីប៉ាក់តេរី តាមលទ្ធផលនៃការស្រាវជ្រាវរបស់មហាវិទ្យា Harvard បានបញ្ជាក់​ថា ការផឹកទឹក​គ្រែនប័ររីមួយថ្ងៃ 30 មីលីលីត្រ ជួយកាត់បន្ថយចំនួន​មេរោគក្នុងផ្លូវទឹកមូត្រនិងជួយបង្ការការឆ្លងមេរោគក្នុងប្លោកនោម ។

-ទប់ស្កាត់មេរោគ E.coli ដោយមានរបាយការណ៍​​ថា ស្រ្តីដែលបានទទួលទានគ្រែនប័ររីជាបន្តបន្ទាប់ ជួយទប់ស្កាត់មេរោគ E.coli (p<0,0001) បើធៀបនឹងស្រ្តី​ដែលមិនបានទទួលទានគ្រែនប័ររី ។

-ដោយសារគ្រែនប័ររីមានជាតិអាស៊ីតតិច ទើបវាអាចជួយទប់ស្កាត់ បង្ការនិងព្យាបាលជំងឺក្រួសក្នុងតម្រងនោមបាន ។ ការផឹកទឹកគ្រែនប័ររី 500 មីលីលីត្រនិងស្ករ 1500 មីលីលីត្រ អាចបង្ការជាតិកកររបស់ Calcium oxalate ដែលជាមួលហេតុសំខាន់នៃការកើតជំងឺក្រួសក្នុងតម្រងនោម បើប្រៀបធៀបនឹងការផឹកទឹកសុទ្ធ ។

-ជួយធ្វើឲ្យរាងកាយមានសភាពធម្មតាបន្ទាប់ពីកើតជំងឺប្រកាច់ ។

១.២.អត្ថប្រយោជន៍

-គ្រែនប័ររីជាផ្លែឈើដែលមានរសជាតិជូរអែម អាចទទួលទានបានទាំងផ្លែស្រស់ ផ្លែក្រៀម គាបយកទឹក ឬភេសជ្ជៈកំប៉ុង ដោយការយកក្រូចតូចល្មម 1 ផ្លែ ក្រូចថ្លុង 1 ចំហៀង គាប​យកតែទឹក ហើយបន្ថែមផ្លែគ្រែនប័ររី 2 ក្ដាប់និងចេក 1 ផ្លែ ក្រឡុកចូលគ្នា  ពេលស្រេចបាច់ក៏យកមកទទួលទាន វានឹងធ្វើឲ្យរាងកាយស្រស់​ស្រាយ ។

-គ្រែនប័ររីសម្បូរដោយសារធាតុប្រឆាំងអុកស៊ីតកម្ម សម្បូរវីតាមីន រួមទាំងរុក្ខគីមីដែលបញ្ចេញប្រតិកម្មបានដើរតួជាសារធាតុប្រឆាំងអុកស៊ីតកម្ម ដូចជា Ca​techins, Quinic acid, Hippuric acid, Pro​a​​​n​thocyanidins, Triterpenoids, Tannin ដែល​​វាមានប្រយោជន៍ចំពោះសុខភាព ។

-ដោយសារគ្រែនប័ររីសម្បូរវីតាមីន ទើបជួយបន្ថែមប្រព័ន្ធ​ភាពស៊ាំដល់រាងកាយនិងជួយទប់ស្កាត់ជំងឺតម្កាត់ដែលកើតឡើងដោយសារអាកាសធាតុត្រជាក់បានល្អ ។

-បង្ការជំងឺមហារីក និងប្រឆាំងការរាលដាលរបស់កោសិកាក្នុងរាងកាយ ។ មានរបាយការណ៍ខាងវេជ្ជសាស្រ្តជាច្រើនពាក់ព័ន្ធនឹងការទទួលទានគ្រែនប័ររី ថាអាចជួយទប់ស្កាត់ការលូតលាស់របស់កោសិកាមហារីក​ដោះ , មហារីកសួត, មហារីកពោះវៀន, មហារីកស្បូន, មហារីកក្រពេញប្រូស្ដាតនិងជំងឺផ្សេងៗជាច្រើនទៀត ។

-ដោយសារការផ្សំសារធាតុ Proanthocyanidins ធ្វើឲ្យកោសិកាមហា​រីកងាប់ដែលតាមរយៈការសិក្សា​បានរកឃើញថាសារធាតុ Proanthocyanidins អាចទប់ស្កាត់វិធីលូតលាស់របស់កោសិកាមហារីកក្រពេញប្រូស្ដាតនិងរកឃើញថាជាគ្រាប់ឈាមដ៏ល្អដែលអាចយកទៅធ្វើជាថ្នាំប្រឆាំងនឹងមហារីកបាន ថែមទាំងជួយសម្លាប់កោសិកាមហារីកស្បូនបាន ដោយសារ Proanthocyanidins អាចធ្វើឲ្យកោសិកាមហារីកងាប់បាន ឬពេលផ្សំនឹងថ្នាំព្យាបាលមហារីកស្បូន អាចជួយបន្ថែមប្រសិទ្ធភាពក្នុងការទប់ស្កាត់ការ​រាលដាលរបស់កោសិកាមហារីក ។

ការទទួលទានគ្រែនប័ររីអាចជួយទប់ស្កាត់ការលូតលាស់របស់កោសិកាមហា​រីកស្បូន ។ Proanthocyanidins ដែលរកឃើញភាគច្រើន​នៅក្នុងផ្លែគ្រែនប័ររីអាចធ្វើឲ្យមានការផ្លាស់ប្ដូររបស់ហ្សែន​មហារីកនិងធ្វើឲ្យកោសិកាមហារីកសួតងាប់ ។

-សារធាតុ Proanthocyanidins ក្នុងផ្លែគ្រែនប័ររីមានតួនាទីជាសារធាតុប្រឆាំងអុកស៊ីតកម្មជួយទប់ស្កាត់ការកើតជំងឺ​បេះដូងនិងបំពង់អាទែ ។ គ្រែន​ប័រ​រីមានសារធាតុប្រឆាំងអុកស៊ីតកម្មក្រុម Flav​o​noids (Anthocy-​anin, Flavonoids, Pro​an​​thocyanidins) ដោយ Fl-a​v​onoids នឹងជួយទប់ស្កាត់ប្រតិកម្មអុកស៊ីតកម្មរបស់កូឡេស្តូរ៉ល (LDL) អាចជួយបង្ការការកកើត Oxidized LD​L ដែលជាមូលហេតុធ្វើឲ្យបំពង់អាទែរួមនិងស្ទះ ។

-ជួយកាត់បន្ថយកូឡេស្តូរ៉លក្នុងឈាម ដែលធ្វើ​​ឲ្យមានគ្រោះថ្នាក់ដល់រាងកាយ ។ សារធាតុប្រឆាំងអុកស៊ីត​កម្មនៅក្នុងផ្លែគ្រែនប័ររីអាចធ្វើឲ្យកន្លែងទទួលកូឡេស្តូរ៉ល ដែលស្ទះកាន់តែធ្វើការ ដែលវាជួយជំរុញការបញ្ចេញរបស់កូឡេស្តូរ៉លពីសរសៃឈាមនិងជួយនាំកូឡេស្តូរ៉លទៅកាន់កោសិកាថ្លើម ។

-ការទទួលទានគ្រែនប័ររីជាប្រចាំអាចជួយប្រឆាំងជំងឺ ឈឺក្បាលរ៉ាំរ៉ៃ ។

-ជួយរំញោចចរន្តឈាម ។

-គ្រែនប័ររីសម្បូរទៅដោយលូទីននិងស៊ីសានទីន ដែលមានប្រយោជន៍នៅក្នុងការជួយកាត់ពន្យារភាពចុះខ្សោយរបស់ក្រដាសភ្នែក ។ ជួយការពារពន្លឺថ្ងៃដែលគ្រោះថ្នាក់ដល់ក្រដាសភ្នែក មិនឲ្យរងការបំផ្លាញ ។ ជួយចម្រោះពន្លឺពណ៌ខៀវដែលបំផ្លាញ​កែវភ្នែកនិងជួយកាត់បន្ថយបញ្ហាជំងឺភ្នែកឡើងបាយនិងជំងឺភ្នែកខ្សោយបាន ។

-សារធាតុ Proanthocyanidins ដែលបានមកពីទឹកគ្រែនប័ររីខាប់អាចជួយកាត់បន្ថយសារធាតុដែល​ធ្វើឲ្យហើមរលាក ដែលកើតពីកោសិកា gin​g​ival fibroblasts បានដូចជា interieukin (IL​-​6​,​IL-8) និង PGE(2) ក្នុងរោគរលាកអញ្ចាញ​ធ្មេញ (Perlodontitis) ទើបអាចកាត់បន្ថយការរលាកហើមបាន ។

-ទឹកគ្រែនប័ររីមានធាតុផ្សំរបស់ High molecular weight non-dialyzable material ដែលអាចទប់ស្កាត់ការតោងទាមនិងការផ្ដុំគ្នារបស់ប៉ាក់តេរី​ក្នុងប្រអប់មាត់បានជាច្រើនប្រភេទ ដែលជាមូល​ហេតុដែលធ្វើឲ្យកើតរោគមាត់ធ្មេញ កំបោរធ្មេញនិង​ប៉ាក់តេរីធ្មេញ ហើយក៏ជួយកាត់បន្ថយជំងឺធ្មេញពុកនិងបង្ការជំងឺរលាកអញ្ចាញធ្មេញបានទៀតផង ។

-ការផឹកទឹកគ្រែនប័ររី 1 ថ្ងៃ 250 មីលីលីត្រ រួមផ្សំនឹងការបានទទួលថ្នាំសម្លាប់មេរោគក្នុងក្រពះ អាចបន្ថែមអត្រានៃការសម្លាប់មេរោគបានខ្ពស់នៅក្នុង​អវយវៈភេទស្រ្តីដែលឆ្លង Helicobacter pylori ដែលជាមេរោគប្រទះឃើញក្នុងក្រពះ ។

-គ្រែនប័ររីជាផ្លែឈើពីធម្មជាតិដែលអាចការពារនិងប្រឆាំងនឹងរោគប្លោកនោមរលាកនិងការឆ្លងរោគក្នុងផ្លូវទឹកមូត្របានល្អបំផុត ដោយគ្រែនប័ររីត្រូវបានកត់ត្រាជាផ្លូវការនៅផ្នែកឱសថសាស្រ្តរបស់សហរដ្ឋអាមេរិក (U.S. Pharmacopeia) ទុកជាថ្នាំព្យាបាលជំងឺទាំងនេះបានផលល្អ (តែនៅមានការប្រទាញប្រទង់គ្នារវាងអ្នកជំនាញមួយចំនួនថា គ្រែនប័ររីធ្វើឲ្យទឹកនោមមានជាតិអាស៊ីត ទើបធ្វើឲ្យមេរោគដែលធ្វើឲ្យឆ្លងងាប់ ឬគ្រាន់តែបង្ការមិនឲ្យប៉ាក់តេរីទាមភ្នាសប្លោកនោមប៉ុណ្ណោះ) ។ អ្នកជំងឺនេះបើផឹកទឹកគ្រែនប័ររីខាប់ (មិនលាយស្ករ) 1 ថ្ងៃ 300 មីលីលីត្ររាល់ថ្ងៃ នឹងជួយបង្ការមិនឲ្យ​កើតជំងឺនេះបានទៀត ដែលតាមរយៈការសិក្សាពីក្រុមស្រ្តីវ័យបង្កកំណើតនិងលទ្ធផលព្យាបាលជំងឺឆ្លងផ្លូវទឹកមូត្រ រកឃើញថា គ្រែនប័ររីអាចកាត់បន្ថយ​​អត្រាឆ្លងមេរោគបានខ្ពស់ដល់ទៅ 50% ក្រៅ​ពីនេះ គ្រែនប័ររីក៏អាចជួយបង្ការការតោងទាមរបស់មេរោគនឹងជាលិកាក្នុងរាងកាយ ដូច្នេះហើយទើបគ្រែនប័ររីត្រូវបានប្រើនៅផ្នែកវេជ្ជសាស្រ្ត ដើម្បី​ព្យាបាលជំងឺផ្លូវទឹកមូត្រឆ្លងមេរោគ, រលាកប្លោកនោម, របួសក្នុងក្រពះ រួមទាំងកំបោរធ្មេញផងដែរ ។

-ការទទួលទានទឹកគ្រែនប័ររីចំនួន 500 មីលីក្រាម បើប្រៀបធៀបនឹងថ្នាំ Trimethoprim នៅក្នុងការបង្ការ ផ្លូវទឹកមូត្ររលាក ប្រទះឃើញថាសារធាតុចម្រាញ់ពីគ្រែនប័ររីអាចជួយការពារបាន តែបានផលតិចជាងថ្នាំ Trimethoprim ។ ទោះយ៉ាងណា អ្នកជំងឺទទួលយកសារធាតុចម្រាញ់ពីគ្រែនប័ររីច្រើនជាងTrimethoprim ដោយសារគ្រែនប័ររីជាផលិតផលធម្មជាតិដែលមានផលប៉ះពាល់ តិចជាង​នៅក្នុងការធ្វើឲ្យដំបៅក្លាយ ឆ្លងមេរោគ និង Clostridium difucile ថែមទាំងមានតម្លៃថោក​ជាងទៀតផង ។

-វីតាមីន C នៅក្នុងផ្លែគ្រែនប័ររីជួយធ្វើឲ្យស្បែកមានសំណើម ទន់រលោង សុខភាពស្បែក កាន់តែល្អ ហើយក៏ជួយបន្ថែមនិងទាញយកខូឡានជែន មកវិញ ។

-គ្រែនប័ររីអាចចម្រាញ់ជាគ្រែមរលោង (Lip gloss) ដើម្បីការពារបបូរមាត់ប្រេះក្រៀមបាន ដោយយក​ផ្លែគ្រែនប័ររីចំនួន 10 ផ្លែលាយនឹងប្រេងអាល់ម៉ុង​ផ្អែម 1 ស្លាបព្រាបាយ, ទឹកឃ្មុំ 1 ស្លាបព្រាតែនិង​ប្រេងវីតាមីន E 1 តំណក់ ស្ងោរឲ្យពុះ រួចយកមក​ច្រោះ ហើយទុកឲ្យត្រជាក់ ពេលស្រេចបាច់អាច​យកមកលាបបបូរមាត់ ។

-បច្ចុប្បន្ននេះផលិតផលដែលផលិតពីផ្លែគ្រែនប័ររី មានច្រើនប្រភេទដូចជា ទឹកផ្លែឈើ, តំណាប់, ទឹកជ្រលក់, ជែម, យ៉ូកឺត, អាហារបំប៉នដែលមានទាំងប្រភេទឆុងនិង Capsule ហើយសំខាន់បំផុតគឺផ្លែគ្រែនប័ររីមិនមែនជាថ្នាំ តែជាផលិតផលធម្មជាតិ ទើបអាចទទួលទានបានដោយគ្មានផលប៉ះពាល់ ដោយនៅផ្នែកវេជ្ជសាស្រ្តសុទ្ធតែទទួលស្គាល់ថាយ៉ាងទូលំទូលាយថា គ្រែនប័ររីមិនថាស្ថិតនៅក្នុងប្រភេទទឹកផ្លែឈើស្រស់, ចម្រាញ់ដាក់ Capsule ឬ ប្រភេទឆុងផឹក គឺសុទ្ធតែមានប្រសិទ្ធិភាពក្នុងការព្យាបាលនិងបង្ការជំងឺប្លោកនោមនិងគ្រឿងក្នុងរបស់ស្រ្តីដែលតែងតែមានបញ្ហារលាកផ្លូវទឹកមូត្រនិងការប្រឹងទប់មិនបញ្ចេញទឹកមូត្រចោល ។

២.តម្លៃអាហារូបត្ថម្ភក្នុង 100 ក្រាម
ឈ្មោះ	ទម្ងន់	ភាគរយ
ថាមពល	៤៦ កាឡូរី
កាបូអ៊ីដ្រាត	១២,២ ក្រាម
ជាតិស្ករ	៤,០៤ ក្រាម
ជាតិសរសៃ	៤,៦ ក្រាម
ជាតិខ្លាញ់	០,១៣ ក្រាម
ប្រូតេអ៊ីន	០,៣៩ ក្រាម
វីតាមីន
វីតាមីន A	៣ មីក្រូក្រាម	០ %
បេតាការ៉ូទីន	៣៦ មីក្រូក្រាម	០ %
វីតាមីន B1	០,០១២ មីក្រូក្រាម	១ %
វីតាមីន B2	០,០២ មីលីក្រាម	២ %
វីតាមីន B3	០,១០១ មីលីក្រាម	១ %
វីតាមីន B5	០,២៩៥ មីលីក្រាម	៦ %
វីតាមីន B6	០,០៥៧ មីលីក្រាម	៤ %
វីតាមីន B9	១ មីក្រូក្រាម	០ %
វីតាមីន C	១៣,៣ មីលីក្រាម	១៦ %
វីតាមីន E	១,២ មីលីក្រាម	៨ %
វីតាមីន K	៥,១ មីក្រូក្រាម	៥ %
ធាតុរ៉ែ
កាល់ស្យូម	៨ មីលីក្រាម	១ %
ជាតិដែក	០,២៥ មីលីក្រាម	១ %
ម៉ាញេស្យូម	៦ មីលីក្រាម	២ %
ម៉ង់ហ្គាណែស	០,៣៦  មីលីក្រាម	១៧ %
ផូស្វ័រ	១៣ មីលីក្រាម	២ %
ប៉ូតាស្យូម	៨៥ មីលីក្រាម	២ %
សូដ្យូម	២ មីលីក្រាម	០ %
ស័ង្កសី	០,១ មីលីក្រាម	១ %
ធាតុផ្សំផ្សេងទៀត
ទឹក	៨៧,១៣ ក្រាម

ប្រភពឯកសារៈវេបសាយបរទេស

ប្រភពរូបភាពៈGoogle