លម៉ើ

លម៉ើ ឬ ល្ម៉ើ (ភាសាអង់គ្លេស : Date palm) ជារុក្ខជាតិមួយប្រភេទ ។

លម៉ើ (ន.) [លៈ-- ] ឈ្មោះឈើមួយប្រភេទសន្តានត្នោត តែមានស្លឹកនិងបន្លាផ្សេងគ្នាអំពីត្នោត ផ្លែតូចៗមានរសផ្អែម ប្រើធ្វើជាបង្អែម : លម៉ើច្រើនដុះក្នុងប្រទេសក្តៅ (សរសេរជា ល្ម៉ើ ក៏បាន តែនាំឲ្យទើសទែងច្រើនជាន់) ។ [វចនានុក្រមខ្មែរ សម្ដេចសង្ឃរាជជួនណាត]

លម៉ើ

ចំណាត់ថ្នាក់វិទ្យាសាស្រ្ត
អាណាចក្រៈ	Plantae
(unranked):	Angiosperms
(unranked):	Monocots
(unranked):	Commelinids
លំដាប់	Arecales
អម្បូរ	Arecaceae
ពួក	Phoenix
ប្រភេទ	P.dactylifera
ឈ្មោះទ្វេនាម Phoenix dactylifera L.

មាតិកា

១.លក្ខណៈរុក្ខសាស្រ្ត

២.ការបង្កាត់ពូជ

៣.អត្ថប្រយោជន៍របស់លម៉ើ

៤.តាមជំនឿសាសនាអ៊ីស្លាម

១.លក្ខណៈរុក្ខសាស្រ្ត

លម៉ើ ជារុក្ខជាតិក្រុមត្នោត មានច្រើនពូជធារ មានដើមកំណើតនៅមជ្ឈិមបូព៌ា អាចលូតលាស់បានល្អនៅតំបន់ដែលមានអាកាសធាតុក្ដៅនិងហួតហែងប្រភេទសមុទ្រខ្សាច់ ។

ដើមមានកម្ពស់ប្រហែល 30 ម៉ែត្រ មានទំហំប្រហែល 30-50 សង់ទីម៉ែត្រ មានស្លឹកជាប់នឹងដើមប្រហែល 40-60 និងមានប្រវែង 3-4 ម៉ែត្រ ដោយមានសណ្ឋានដូចរោមបក្សី បណ្ដូលចេញគ្រប់ទិស ឯកញ្ចុំផ្កាចេញពីគល់ស្លឹក ។

ផ្លែមូលទ្រវែង មានប្រវែងពី 2-4 សង់ទីម៉ែត្រ មានរសជាតិផ្អែម ទទួលទានបានទាំងផ្លែខ្ចីនិងផ្លែទុំ ។ ផ្លែមានពណ៌លឿងទៅដល់ពណ៌ទឹកក្រូច ហើយប្រែជាពណ៌ត្នោតចាស់ពេលចាស់ ។

ផ្លែទុំអាចយកទៅហាលនិងទុកបានរយៈពេលច្រើនឆ្នាំ មានរសជាតិផ្អែមឆ្អិត ទើបវាត្រូវយល់ច្រឡំថាយកទៅជ្រលក់នឹងទឹកត្នោត ។

ដើមលម៉ើ

ផ្កាលម៉ើ

ផ្លែលម៉ើ

គ្រាប់លម៉ើ

២.ការបង្កាត់ពូជ

-ការប្រើគ្រាប់

-ការបំបែកខ្នែងពីដើមធំ (ដើមញី) ដោយជ្រើសរើសដើមញីដែលមានអាយុពី 5 ឆ្នាំឡើងទៅ ។

៣.អត្ថប្រយោជន៍របស់លម៉ើ

អត្ថប្រយោជន៍របស់លម៉ើអាចបែងចែកជា 2 ផ្នែកធំៗ ៖

៣.១ ផ្នែកអាហារ

សារធាតុចិញ្ចឹមដែលមានប្រយោជន៍ចំពោះរាងកាយរបស់ផ្លែលម៉ើ មានដូចជា កាល់ស្យូម, ស្ពាន់ធ័រ, ជាតិដែក, ម៉ាញេស្យូម, ម៉ង់ហ្កាណែស, ផូស្វ័រ, ប៉ូតាស្យូម និងប្រេងអូវ៉ាតៃ ថែមទាំងសម្បូរទៅដោយកាកសរសៃដែលអាចជួយកាត់បន្ថយអាការហើមពោះ រួមទាំងមានថាមពលខ្ពស់ ប៉ូវរាងកាយដែលចុះខ្សោយឲ្យមានកម្លាំងកំហែង ក្រៅពីនេះអាចប៉ូវសាច់ដុំស្បូននិងបង្កើតទឹកដោះរបស់អ្នកម្ដាយផងដែរ ។

៣.២ ផ្នែកឱសថ

ផ្លែលម៉ើជួយប៉ូវរាងកាយ ប៉ូវភ្នែក កាត់បន្ថយការស្រេកឃ្លាន កែរោគវិលមុខ ជួយកាត់បន្ថយជាតិស្លេស្មក្នុងបំពង់ក ធ្វើឲ្យឆ្អឹងរឹងមាំ កាត់បន្ថយជាតិស្ករក្នុងឈាមនិងសម្ពាធឈាមខ្ពស់ ។

ក្រៅពីនេះអាចជួយសម្លាប់មេរោគនិងសារជាតិពុលដែលមានក្នុងពោះវៀននិងប្រព័ន្ធរំលាយអាហារ អាចកម្ចាត់សារធាតុពុល និងទប់ស្កាត់ការធំធាត់របស់មេរោគដែលជាមូលហេតុធ្វើឲ្យកើតរោគមហារីកក្រពះ ។

៤.តាមជំនឿសាសនាអ៊ីស្លាម

តាមសាសនាអ៊ីស្លាម ណាប៊ី មហាម៉ាត់ បានទូន្មានថា ជនណាដែលកាន់សីលតមអាហារ ពេលទទួលទានអាហារដំបូង ឲ្យទទួលទានផ្លែលម៉ើនិងទឹកបរិសុទ្ធ ។ ដោយសារផ្លែលម៉ើមានសារធាតុចិញ្ចឹមដែលមានអត្ថប្រយោជន៍ច្រើនចំពោះរាងកាយ ទើបវាស័ក្តិសមសម្រាប់អ្នកដែលអត់អាហាររយៈពេលយូរ ។