ហាណាមិ

ហាណាមិ (ជប៉ុនៈはなみ, កាន់ជិៈ花見, រ៉ូម៉ាជិៈHanami, ភាសាអង់គ្លេសៈFlower Vi​e​w​i​n​g​) ជាប្រពៃណីតាំងពីបរមបុរាណរបស់ប្រទេសជប៉ុន ដែលនិយាយពីការគយគន់ដោយភ្លើតភ្លើននឹងសម្រស់ផ្កា ជា​ពិ​សេ​​​​សផ្កាសាគូរ៉ា ។

ប្រពៃណីហាណាមិ កើតឡើងតាំងពីជាង 1000 ឆ្នាំមុននៃគ.ស ដោយនៅតែទទួលបានការនិយមក្នុង​ប្រ​​ទេសជប៉ុនរហូតមកដល់សព្វថ្ងៃនេះ ។​ ហាណាមិ ត្រូវបានរៀបចំឡើងនៅចន្លោះរដូវស្លឹកឈើលាស់ ខុសពីប្រពៃណីម៉ូមិជិការិ ដែលរៀបចំឡើងនៅរដូវស្លឹកឈើជ្រុះ ។

មាតិកា

១.ប្រវត្ដិ “ប្រពៃណីគយគន់ផ្កា” ឬ “ហាណាមិ”

២.ទស្សនៈនិងតន្រ្តីពាក់ព័ន្ធនឹងផ្កាសាគូរ៉ា

៣.ពេលវេលាដែលស័ក្ដិសមសម្រាប់ការគយគន់ផ្កាសាគូរ៉ា

៤.ទីកន្លែងដែលត្រូវបានណែនាំសម្រាប់គយគន់ផ្កាសាគូរ៉ា

 

១.ប្រវត្ដិ “ប្រពៃណីគយគន់ផ្កា” ឬ “ហាណាមិ”

ប្រពៃណីគយគន់ផ្កាសាគូរ៉ារបស់ជប៉ុន មានឈ្មោះបោះសំឡេងណាស់ ព្រោះក្រៅពីយើងបានឃើញផ្កាសាគូរ៉ារីកស្អាតហើយ​ នៅឃើញជនជាតិជប៉ុនយកម្ហូបអាហារ រួមទាំងស្រាតំណែលដូនតាគឺស្រាសាកេនិងភេសជ្ជៈជាច្រើនទៀតមកអបអរដោយការក្រាលកន្ទេលអង្គុយនៅក្រោមដើមសាគូរ៉ាដែលមានផ្ការីកស្គុសស្គាយពេញដើម ។ នៅក្នុងកម្មវិធីនេះ ជនជាតិ​ជប៉ុនភាគច្រើននាំគ្នាច្រៀងរាំលេងយ៉ាងសប្បាយរីករាយទៀតផង ។

កាលសម័យបុរាណ មានការតំណាលថានៅសម័យ  “ណារ៉ា” មានតែ “ប្រពៃណីគយគន់ផ្កាប៉េះ” ប៉ុ​ណ្ណោះ ប៉ុន្តែពេលមកដល់សម័យ “ហេអាន់” ក៏មានការផ្លាស់ប្ដូរជា “ប្រពៃណីគយគន់ផ្កាសាគូរ៉ា” ដោយគ្មានមូល​ហេតុ ។

បុគ្គលដែលបានសិក្សាពីដើមកំណើតនិងប្រភព​ “ប្រពៃណីគយគន់ផ្កាសាគូរ៉ា” បាននិយាយថា ដើមឡើយ “ប្រពៃណីគយគន់ផ្កា” ឬ “ប្រពៃណីគយគន់ផ្កាសាគូរ៉ា” ត្រូវបានធ្វើឡើងដោយកសិករដែលជា​សរសៃ​ឈាមនៃប្រទេសជាតិ ។ ជារៀងរាល់ឆ្នាំពេលធ្វើស្រែចម្ការ ពួកគេត្រូវរៀបចំពិធីបួងសួងសុំខមាទោសពីអ្នកតា​ម្ចាស់​ទឹកម្ចាស់ដី ដោយពិធីបួងសួងនេះមានឈ្មោះថា សាគូរ៉ាណុសាវ៉ា (អ្នកតាម្ចាស់ស្រែ) ព្រោះពួកគេមានជំនឿតាំងពីដូនតាមកម្ល៉េះថា ទីណាមានដើមសាគូរ៉ា ទីនោះមានសំណាក់អ្នកតា (ខ្ទមអ្នកតា?) ។

ដូច្នេះហើយទើបមានការគោរពបូជាម្ចាស់ទឹកម្ចាស់ដី ដោយការក្រាលកន្ទេល និងដាក់គ្រឿងសែនព្រេននៅក្រោមដើម សាគូរ៉ាកើតឡើង ហើយនៅខណៈដែលរង់ចាំឲ្យអ្នកតាសេពសោយសំណែននោះ ពួកគេបានមូល​មតិគ្នា ប្រើប្រាស់ពេលវេលានោះឲ្យមានប្រយោជន៏ ដោយការជួបជុំគ្នា និយាយលេងពីនេះពីនោះនិងគយគន់ផ្កាសាគូរ៉ាផងដែរ ។

នេះហើយជាចំណុចចាប់ផ្ដើម ឬជាមូលហេតុធ្វើឲ្យមាន “ប្រពៃណីគយគន់ផ្កាសាគូរ៉ា” កើតឡើងនិងត្រូវបានប្រកាន់ខ្ជាប់តៗគ្នា ពីមួយជំនាន់ទៅមួយជំនាន់រហូតមកដល់សព្វថ្ងៃនេះ ។

ប្រពៃណីគយគន់ផ្កាសាគូរ៉ាដែលកើតឡើងនៅសម័យ “ហេអាន់”​ តាមការតំណាលនាពេលនោះបានឲ្យដឹងថា ត្រូវបានប្រារព្ធតែនៅក្នុងសង្គមអភិជននិងមន្រ្ដីជាន់ខ្ពស់ប៉ុណ្ណោះ ។ ជារៀងរាល់ឆ្នាំ ខណៈដែលផ្កាសាគូរ៉ារីកត្រសោលពេញដើម គឺនៅខែមេសា ពួកអភិជននិងក្រុមមន្រ្តីជាន់ខ្ពស់ភាគច្រើននាំគ្នាសប្បាយរីករាយនឹងការគយគន់ផ្កាសាគូរ៉ា ហើយកំណត់ឲ្យមានការប្រកួតប្រជែងការតែងកំណាព្យ ដែលមានឈ្មោះថា “ហៃគឹ” ។

ប៉ុន្ដែប្រពៃណីគយគន់ផ្កាសាគូរ៉ាត្រូវបានកែប្រែដោយពួកសាមូរ៉ៃ, អ្នកចម្បាំងនិងពួកស្នំក្រមការក្នុងរាជវាំង ដោយចាត់ទុកប្រពៃណីនេះនៅសម័យកាលនោះថាជាការជួបជុំគ្នា ទទួលទានអាហារ ច្រៀងរាំយ៉ាងសប្បាយរីករាយ ។

ក្រោយមកប្រពៃណីគយគន់ផ្កាសាគូរ៉ាក៏បានសាយភាយទៅក្រៅរាជធានី រហូតដល់សង្គមជាន់ទាប ដោយមានការជួបជុំគ្នាយ៉ាងសប្បាយរីករាយ មានការទទួលទានអាហារ ច្រៀងរាំលេងកម្សាន្ដ រួមទៅដល់ការផឹកស្រាសាកេទៀតផង ដែលទង្វើនេះវាស្រដៀងនឹងទង្វើរបស់ជនជាតិជប៉ុននាពេលបច្ចុប្បន្ន ។

២.ទស្សនៈនិងតន្រ្តីពាក់ព័ន្ធនឹងផ្កាសាគូរ៉ា

ផ្កាសាគូរ៉ា ក្រៅពីជាផ្កាតំណាងជាតិហើយ ក៏ជារាជិនីផ្ការបស់ជប៉ុនផងដែរ ទើបសាគូរ៉ាត្រូវចាត់ទុកថាជាផ្កាមង្គល​ ជាផ្កានៃការចាប់ផ្ដើម ព្រោះសាគូរ៉ារីកនៅរដូវផ្ការីកដែលប្រៀបដូចរដូវនៃការចាប់ផ្ដើមនូវរឿងរ៉ាវជាច្រើន ដែលចាត់ទុកថាជាពេលវេលានៃភាពត្រជាក់ត្រជុំត្រសុំត្រសាយ ។

ផ្កាសាគូរ៉ានឹងរីកឲ្យគយគន់ប្រហែល 7 ថ្ងៃ និងពេលរោយនោះក៏មានសម្រស់គួរឲ្យគយគន់ដែរ ធ្វើឲ្យមានសំនួននៅក្នុងភាសាជប៉ុនថា “សាគូរ៉ា 7 ថ្ងៃ” ដែលមានន័យថា “សម្រស់មិនអាចស្ថិតស្ថេរចេរកាល” ទុកសម្រាប់ដាស់តឿនបញ្ញាស្មារតី ។ ក្រៅពីនោះនៅមានន័យបង្កប់ជាសច្ចធម៌ក្នុងការលើក​ទឹកចិត្តទៀតផង ដែលមានន័យថា “គ្រប់យ៉ាងសុទ្ធតែមានការផ្ដើមថ្មីជានិច្ច ទោះផ្កាសាគូរ៉ារោយនៅឆ្នាំនេះ ប៉ុន្តែឆ្នាំក្រោយដល់រដូវកាល ផ្កាសាគូរ៉ារីកត្រសោលម្ដងទៀត” ។

ផ្កាសាគូរ៉ារុះរោយ ត្រូវបានជនជាតិជប៉ុនយកទៅប្រើប្រាស់ការសម្ដែងល្ខោនខាប៊ឹគិ ។ បើមានឆាកណាមានផ្កាសាគូរ៉ា ឆាកនោះចង់បញ្ជាក់ពី “ភាពវិនាសនិងសេចក្ដីស្លាប់” ដែលផ្សារភ្ជាប់នឹងរឿង​រ៉ាវ​នៃការបាត់បង់ជីវិតរបស់ទាហានជប៉ុននៅសង្រ្គាមលោកលើកទី 2 ដែលទាហានទាំងនោះបានពលីជីវិតនៅសមរភូមិហាក់ដូចផ្កាសាគូរ៉ា ។

ដូច្នេះហើយទើបផ្កាសាគូរ៉ាក៏ត្រូវបានប្រកាន់យកជានិមិត្តរូបនៃអ្នកចម្បាំងនិងសាមូរ៉ៃរបស់ជនជាតិជប៉ុនផងដែរ ។

តន្រ្តីដែលពាក់ព័ន្ធនឹងផ្កាសាគូរ៉ា ដែលជាទីពេញនិយមរបស់ជនជាតិជប៉ុន៖

ភាសាជប៉ុននិងសូរអានជាភាសាខ្មែរ	ប្រែសម្រួលជាភាសាខ្មែរ
さくら さくら 野山も里も សា-គឹ-រ៉ា  សា-គឹ-រ៉ា  ណុ-យ៉ា-ម៉ា ម៉ុ សា​-តូ ម៉ុ 見わたす限り មិ វ៉ា-តា-ស៊ឹ កា-ហ្គិ-រិ かすみか雲か 朝日ににおう កា-ស៊ឹ-មិ កា គឹ-ម៉ុ កា អា-សា-ហ៊ិ និ និ-អូ さくら さくら 花ざかり សា-គឹ-រ៉ា សា-គឹ-រ៉ា ហា-ណា ហ្សា-កា-រិ	សាគូរ៉ា សាគូរ៉ា នៅព្រៃភ្នំ នៅក្នុងស្រុកភូមិ ឆ្ងាយដាច់កន្ទុយភ្នែក ។ ស្រដៀងពពក អ័ព្ទ ក្រអូបក្រអួនទទួលអរុណរះ សាគូរ៉ា សាគូរ៉ា រីកត្រសោល ។

៣.ពេលវេលាដែលស័ក្ដិសមសម្រាប់ការគយគន់ផ្កាសាគូរ៉ា

ផ្កាសាគូរ៉ារីកត្រឹម 1 ឬ 2 សប្ដាហ៍តែប៉ុណ្ណោះ ដោយរីកពីខែមីនាដល់ខែមេសា ។ នៅវេលានោះជនជាតិជប៉ុននាំគ្នាសោ​ម​នស្ស ផ្កាសាគូរ៉ារីកត្រសោលពេញដើម បន្ទាប់ពីកញ្ចុំដំបូងរីកប្រហែលជា 1 ​សប្ដាហ៍ ។ ហើយប៉ុន្មានសប្ដាហ៍ក្រោយមក​ពេលផ្ការីកពេញដើម វានឹងជ្រុះចាកទង ។

ក្រៅពីនេះនៅមានប្រពៃណីគយគន់ផ្កាមួយទៀតដែលមានអាយុកាលចាស់ជាងការគយគន់សាគូរ៉ា នោះគឺផ្កាម៉ី (​ផ្កាបួយ) រីក ដែលនៅតែត្រូវបានប្រារព្ធនៅក្នុងប្រទេសជប៉ុន ជាពិសេសនៅក្នុងសង្គមមនុស្សចាស់ដែលត្រូវការភាពស្ងប់ស្ងាត់ជាងការគយគន់ផ្កាសាគូរ៉ារីក ដែលជាការពេញនិយមរបស់យុវវ័យ, អ្នកមានទ្រព្យសម្បត្ដិនិងអ្នកមានកេរ្តិ៍ឈ្មោះ ។

៤.ទីកន្លែងដែលត្រូវបានណែនាំសម្រាប់គយគន់ផ្កាសាគូរ៉ា

Øនៅតំបន់ក្នុងប្រទេសជប៉ុន

ទីកន្លែងដែលជាប្រភពគយគន់ផ្កាសាគូរ៉ា មានឈ្មោះបោះសំឡេងនិងមានការនិយមនៅប្រទេសជប៉ុន មានដូចខាងក្រោមនេះ៖

·   តូក្យូ

1.សួនអ៊ិណុកុស៊ិរ៉ា ស្ថិតនៅខណ្ឌមុសាស៊ិណុ និងខណ្ឌមិតាកា ភាគខាងលិចរាជធានីតូក្យូ ។

2.សួនអ៊ឹអិណុ ស្ថិតនៅខណ្ឌថៃតុ មានដើមសាគូរ៉ាជាង ​1,500 ដើម ធ្វើឲ្យក្លាយជាកន្លែងគយគន់ផ្កាសាគូរ៉ាដែលមានមនុស្សណែនណាន់តាន់តាប់ ។

3.ឧទ្យានជាតិនៃស៊ីនជឹគឹ ស្ថិតនៅខណ្ឌ​ស៊ីនជឹគឹ​និងស៊ីនបឹរ៉ា ។

4.សុសានអាអុយ៉ាម៉ា ខណ្ឌមិណាតុ ។

·   ក្យូតូ

1.តិស៊ឹហ្កាគឹណុមិឈិ ស្ថិតនៅចន្លោះវត្ដគីនកាគឹនិងវត្ដណាន់ស៊ែន ជាផ្លូវដើរតាមដងអូរ មានដើមសាគូរ៉ាអមតាមដងផ្លូវ ។

2.អូរអូកាសាគិ ភ្ញៀវទេសចរអាចជិះទូកគយគន់ផ្កាសាគូរ៉ាបាន ។

·   អូសាកា

សួនសាធារណៈប្រាសាទអូសាកា ផ្នែកខាងក្នុងជាទីតាំងរបស់ប្រាសាទ ក្នុងសួនមានដើមសាគូរ៉ាជាង 600 ដើម និងមានដើមផ្លាំ ផងដែរ ។

Osaka Castle

·   ណាហ្គោយ៉ា

សួនសាធារណៈប្រាសាទណាហ្គោកូយ៉ា ជាតំបន់គយគន់ផ្កាសាគូរ៉ា ទទួលបានការនិយមជាងគេនៅក្នុងប្រាសាទណាហ្គោយ៉ា សួនមានផ្ទៃក្រឡាធំ មានដើមសាគូរ៉ាដល់ទៅ 1,600 ដើម​ ។

ក្រៅពីនេះនៅមានទីកន្លែងគយគន់ផ្កាសាគូរ៉ាពាសពេញផ្ទៃប្រទេស ដូចជាក្រុងយ៉ូកូហាម៉ា, ប្រាសាទហ៊ិមេជិ ក្រុងហ៊ិមេជិ , ប្រាសាទហ៊ិរ៉ូសាគិ ក្រុងហ៊ិរ៉ូសាគិ ជាដើម ។

Øនៅតំបន់ក្រៅប្រទសជប៉ុន

មានដូចជា ចិន, តៃវ៉ាន់, កូរ៉េ​, ហ្វ៊ីលីពីន, សហរដ្ឋអាមេរិក, អ៊ីតាលី...។

ប្រភពឯកសារនិងរូបភាពៈវេបសាយបរទេស