សាគូរ៉ា

សាគូរ៉ា ឬ សាគឹរ៉ា (ជប៉ុន: さくら, រ៉ូម៉ាជិ​: Sakura,​ កាន់ជិៈ 桜/櫻, ឈ្មោះវិទ្យាសាស្ត្រៈ Prunus serrulata) ជាឈ្មោះសាមញ្ញសម្រាប់ហៅឈ្មោះផ្កាតំណាងអត្តសញ្ញាណជាតិ​នៃប្រទេសជប៉ុន ។

សាគូរ៉ា មានប្រភទ​នៅប្រទេសចិនភាគខាងត្បូង, កោះតៃវ៉ាន់, ប្រជុំកោះអូគីណាវ៉ានៃប្រទេសជប៉ុន ។

មាតិកា

១.ប្រភពនៃពាក្យថា «សាគូរ៉ា»

២.ប្រភេទនិងពូជរបស់សាគូរ៉ា

៣.ឈ្មោះជាភាសាផ្សេងទៀត

១.ប្រភពនៃពាក្យថា «សាគូរ៉ា»

ពាក្យថា «សាគូរ៉ា» នៅក្នុងភាសាជប៉ុន មានការសន្និដ្ឋានថា​មកពីពាក្យ «សាគឹយ៉ា» (咲耶/ Bloom) ដែលជាឈ្មោះរបស់ទេពធីតា កូណូ ហាណា សាគឹយ៉ា អ៊ិម៉ិ )木花之開耶姫)  នៅ​ក្នុងទេវកថារបស់ជប៉ុន មានវិហាររបស់ទ្រង់នៅលើកំពូលភ្នំហ្វឹជិ (ហ្វុជិ) ។ សម្រាប់ព្រះនាមរបស់ទេពធីតាអង្គនេះមានន័យថា «ព្រះនាងផ្ការីក» និងដោយសារសាគូរ៉ាជាផ្កាដែលមានការពេញនិយមខ្លាំងនៅជប៉ុននាសម័យនោះ ទើបពាក្យថា ផ្កា ដូច​ដែលបានរៀបរាប់នេះមានន័យដល់ ផ្កាសាគូរ៉ា នោះឯង ។

ផ្កាសាគូរ៉ាមានពណ៌, ចំនួនត្របកខុសៗគ្នាទៅតាមពូជតាមប្រភេទ ។ ភាពលេចធ្លោរបស់ផ្កាសាគូរ៉ា គឺពេលរោយ វារោយស្រុះគ្នា ទើបសាគូរ៉ាជាតំណាងរបស់យោធានិងភាពជាបឹស៊ិដុ (ប៊ូស៊ីដូ) របស់ជប៉ុន ។

ផ្កាសាគូរ៉ាមាននៅប្រទេសកូរ៉េ, សហរដ្ឋអាមេរិក, កាណាដា, ចិននិងតំបន់ដទៃទៀត តែគ្មានក្លិននោះទេ ខណៈដែលសាគូរ៉ា​ជប៉ុនត្រូវបានមនុស្សភាគច្រើនសរសើរអំពីក្លិននិងតែងតែត្រូវបានយកទៅលម្អនៅក្នុងបទកំណាព្យ ដោយផ្កាសាគូរ៉ារីកនៅចុងខែមីនា-ដើមខែមេសា ដែលជាដើមរដូវផ្ការីក សីតុណ្ហភាពចាប់ផ្ដើមក្ដៅបន្ទាប់ពីផុតរដូវរងា ។

២.ប្រភេទនិងពូជរបស់សាគូរ៉ា

សាគូរ៉ានៅប្រទេសជប៉ុនភាគច្រើនជាសាគូរ៉ាពូជ Somei Yoshino និង Yamazakura ។ ពូជនីមួយៗមានលក្ខណៈខុសគ្នាផ្នែកពណ៌ សណ្ឋានរបស់ផ្កា ពេលវេលានៃការចេញផ្កា ពេលវេលានៃផ្ការីកនិងពេលផ្ការោយ ដោយសង្កេតឃើញតាមរយៈរូបដូចខាងក្រោមនេះ៖

ផ្កាមាន 5 ត្របក ដូចជាពូជ Oshimazakura

ផ្កាមាន 20 ត្របក ដូចជាពូជ Ichiyo

ផ្កាមាន 100 ត្របក ដូចជាពូជ Kikuzakura

#ចំនួនត្របកផ្កា

ផ្កាសាគូរ៉ាភាគច្រើនមានត្របក 5 ពូជខ្លះទៀតមានលើស​ពី 5 ឡើងទៅ ដូចជា ត្របក 10, ត្របក 20 ឬច្រើនជាងនោះ ដែលតែងតែផ្កាមានត្របកលើសពី 5 ត្រូវហៅថា yaezakura ។

ផ្កាពណ៌លឿង ដូចជាពូជ Ukon

ផ្កាពណ៌ផ្កាឈូក ដូចជាពូជ Kikuzakura

ផ្កាពណ៌ស ដូចជាពូជ Shogetsu

#បែងចែកប្រភេទតាមពណ៌របស់ផ្កា

ពូជសាគូរ៉ាភាគច្រើនមានពណ៌ផ្កាឈូក, ពណ៌ស្វាយ, ពណ៌សនិងផ្កាដែលមានពណ៌ផ្កាឈូកចាស់ ឬពណ៌លឿងក៏មាន ។ ពណ៌សម្រាប់ពូជខ្លះអាចប្តូរពណ៌បាន គឺពេលដែលផ្កា សាគូរ៉ានៅក្រពុំនឹងមានពណ៌ស តែពេលរីកនឹងក្លាយជាពណ៌ផ្កាឈូក ។

#រយៈពេលដែលផ្ការីក

ផ្កាសាគូរ៉ាភាគច្រើនរីកនៅរដូវស្លឹកឈើលាស់ តែមានពូជខ្លះរីកនៅចុងរដូវស្លឹកឈើជ្រុះនិងនៅរដូវរងា ។ សម្រាប់សាគូរ៉ា​ប្រភេទ Yaezakura ឬផ្កាសាគូរ៉ាដែលមានត្របកលើសពី 5 ពេល​រីក វាអាចរក្សាសភាពបានរយៈពេលពី 2-4 សប្ដាហ៍ ។

គុម្ពផ្កាសណ្ឋានតំណក់ទឹក (weeping)

គុម្ពផ្កាសណ្ឋានសំប៉ែត

សាគូរ៉ាអាយុ 100 ឆ្នាំ

#សណ្ឋានរបស់ដើមនិងគុម្ពផ្កា

ពូជសាគូរ៉ានីមួយៗមានសណ្ឋាន រូបរាងខុសៗគ្នា ដូចជាសណ្ឋានបីជ្រុង, សសរ ឬលូតត្រង់, អក្សរវី (V-shape), សណ្ឋានដូចតំណក់ទឹក (weeping), សណ្ឋាន​សំប៉ែត (flat​-​topped) ជាដើម ដោយប្រភេទ Weeping ហៅថា shidar​e​zakura ។

#សាគូរ៉ាពូជផ្សេងទៀត

-Somei Yoshino (Yoshino Cherry)

ពេលវេលាដែលផ្ការីកៈ ចុងខែមីនា ឬដើមខែមេសា

តាមការស្រាវជ្រាវបានរកឃើញថា សាគូរ៉ាពូជ Somei Yoshino ត្រូវចាប់ដាំដុះនៅសម័យ Edo និងជាពូជដែលអាច​ប្រទះឃើញទូទាំងប្រទេសជប៉ុន ។ Somei Yoshino មានពណ៌​ផ្កាឈូកនិងមានត្របក 5 ។

-Yamazakura

ពេលវេលាដែលផ្ការីកៈ ចុងខែមីនា ឬដើមខែមេសា

សាគូរ៉ាពូជ Yamazakura ជាពូជដែលមានប្រភពនៅជប៉ុន ដោយភាគច្រើនប្រទះឃើញតាមជ្រលងភ្នំ ។ ផ្ការបស់វាមានពណ៌ផ្កាឈូកខ្ចីនិងមានត្របក 5 តែត្របករាងតូច ។

 -Shidarezakura (Weeping Cherry)

ពេលវេលាដែលផ្ការីកៈ ចុងខែមីនា ឬដើមខែមេសា

សាគូរ៉ាពូជ Shidarezakura មានសណ្ឋានដូចតំណក់​ទឹក គឺផ្កាចេញមកជាកញ្ចុំនិងសំយុងពីដើម ទើបត្រូវចាត់ទុកជា Weeping ។ វាមានត្របក 5 និងពូជខ្លះមានត្របកលើស​ពី 5 បច្ចុប្បន្នហៅថា Yaeshidare sakura ។

-Ichiyo

ពេលវេលាដែលផ្ការីកៈ ពាក់កណ្ដាលខែមេសា

សាគូរ៉ាពូជ Ichiyo មានត្របកផ្កាប្រហែល 20 ពណ៌ផ្កា​ឈូកខ្ចីនិងស្រទបមានពណ៌បៃតងនៅពេលរីក ដែល​សាគូរ៉ាភាគច្រើនពេលរីកនឹងជម្រុះស្លឹកទាំងអស់ តែពូជនេះ​មានត្រួយក្ដោបកញ្ចុំផ្កា ។

-Ukon

ពេលវេលាដែលផ្ការីកៈ ពាក់កណ្ដាលខែមេសា

ពូជ Ukon មានត្របកទាំងអស់ពី 10-20 និងមានស្លឹក​ពណ៌ទង់ដែង ។ សាគូរ៉ា Ukon មានភាពលេចធ្លោមិនដូចពូជ​ដទៃទៀត គឺត្របកផ្កាមានលក្ខណៈពិសេសត្រង់ផ្កាមានពណ៌លឿង ។

-Kanzan

ពេលវេលាដែលផ្ការីកៈ ពាក់កណ្ដាលខែមេសា

នៅក្នុងចំណោមពូជ yaezakura (ពូជកំណើត) ពូជKanzan ជាពូជមួយដែលអាចប្រទះឃើញញឹកញាប់ ។ ផ្ការបស់ Kanzan មានត្របកប្រហែល 30-50 មានពណ៌ផ្កា​ឈូក ពេលរីកនឹងមានស្លឹកពណ៌បៃតងច្រុះតាមកញ្ចុំផ្កា​ ។ Kanzan ជាពូជមួយទៀតដែលមិនជម្រុះស្លឹក ។

  

-Fugenzo

ពេលវេលាដែលផ្ការីកៈ ពាក់កណ្ដាលខែមេសា-ចុងខែ

ពូជ Fugenzo ជាសាគូរ៉ាដែលផ្កាក្ររីក និងជាពូជកំណើតដូចគ្នា (yaezakura) ។  ជាទូទៅផ្ការបស់វាមានត្របកប្រហែល 30-40 ក្នុងមួយកញ្ចុំ ។ ត្របកផ្កាមានពណ៌សព្រលាំផ្កាឈូក ឬ​ផ្កា​ឈូកខ្ចី តែពេលរីកនឹងមានពណ៌ផ្កាឈូកចាស់ ស្លឹកមានពណ៌បៃតងព្រលាំត្នោត ។

-Shogetsu

ពេលវេលាដែលផ្ការីកៈ ដើមខែមេសា-ចុងខែមេសា

សាគូរ៉ាពូជ Shogetsu ជាពូជដែលក្ររីកជាងគេ ស្ថិតនៅក្នុងពូជ yaezakura (ពូជកំណើត) និងមានទំហំធំ ផ្កាមានពណ៌ស មានត្របក​ប្រហែល 20-30 ចំណែកស្លឹកមានពណ៌បៃតងពេលផ្ការីក ។

-Kikuzakura (Chrysanthemum Cherry)

ពេលវេលាដែលផ្ការីកៈ ចុងខែមេសា-ដើមខែឧសភា

សាគូរ៉ាពូជ Kikuzakura មានត្របកផ្កាលើសពី 100 ផ្កាមានភិនភាគស្រដៀងនឹងផ្កាគ្រីសាន (kiku) ទើបដាក់ឈ្មោះពូជនេះថា Kikuzakura ដែលជាពូជក្ររីកជាងគេមួយទៀត ហើយពេលដែលវារីក ស្លឹកនឹងជ្រុះអស់ ពណ៌ផ្កាគឺផ្កាឈូកចាស់ ។

ក្រៅពីពូជដែលបានរៀបរាប់ខាងលើហើយ សាគូរ៉ានៅមាន​ពូជជាង 100 ទៀត ។

៣.ឈ្មោះជាភាសាផ្សេងទៀត

-ភាសាកូរ៉េៈ벚꽃 (beoj-kkoch)

-ភាសាចិនៈ樱花 (Yīnghuā)

-ភាសាថៃៈ ซากุระ (Sākura)

-ភាសាអង់គ្លេស: Cherry blossom, Japanese flowering cherry, Hill cherry, Oriental cherry, East Asian cherry

ប្រភពឯកសារៈវេបសាយបរទេស

ប្រភពរូបភាពៈGoogle