ជើងចាប

ជើងចាប មានឈ្មោះវិទ្យាសាស្រ្តថា Dasymaschalon lomentaceum Finet & Gagnep ស្ថិតនៅក្នុងអម្បូរ Annonaceae ។

ជើងចាប ( ន. ) ឈ្មោះ​ឈើ​ធំ​មួយ​ប្រភេទ មាន​ខ្លឹម​ជាប់​ប្រើ​ធន់​បាន​យូរ ។ ឈ្មោះ​ឈើ​មួយ​ប្រភេទ​ទៀត​មាន​ផ្លែ​ទ្រង់​ទ្រាយ​ស្រដៀង​នឹង​ក្រញាំ​ជើង​សត្វ​ចាប កាល​ណា​ទុំ​សម្បុរ​ឡើង​ក្រហម បរិភោគ​បាន ។ [វចនានុក្រមខ្មែរ សម្ដេចសង្ឃរាជជួនណាត]  

ផ្លែជើងចាបទុំ
ចំណាត់ថ្នាក់វិទ្យាសាស្រ្ត
អាណាចក្រ	Plantae
(unranked)	Angiosperms
(unranked)	-
(unranked)	Magnoliids
លំដាប់	Magnoliales
អម្បូរ	Annonaceae
ពួក	Dasymaschalon
ប្រភេទ	D. lomentaceum
ឈ្មោះទ្វេនាម Dasymaschalon lomentaceum

មាតិកា

១.លក្ខណៈរុក្ខសាស្រ្តជើងចាប

២.អត្ថប្រយោជន៍របស់ជើងចាប

១.លក្ខណៈរុក្ខសាស្រ្តជើងចាប

ដើមជើងចាប

ជើងចាបត្រូវចាត់ទុកជាចុល្លព្រឹក្ស មិនជម្រុះស្លឹក និងប្រក់ស្លឹក ។ ដើមរបស់វាត្រង់ បែកមែកច្រើន មានកម្ពស់ប្រហែលពី 1-2 ម៉ែត្រ ។ សម្បកដើមមានពណ៌ត្នោតខ្មៅ ឬត្នោតក្រហម មានរន្ធខ្យល់ពណ៌សតូចៗពេញដើម ។ សាច់ឈើស្វិត មែកខ្ចីមានពណ៌បៃតង ។

ជើងចាបបន្តពូជដោយការព្រោះគ្រាប់ ។

ស្លឹកជើងចាប

ស្លឹកជើងចាប ជាស្លឹកទោល (simple leaf) ចេញឆ្លាស់គ្នាពីធាងតែមួយ ។ សណ្ឋានរបស់ស្លឹករាងពងក្រពើ មានគែមដូចរណា ។ ចុងស្លឹករៀវ ឬស្រួចមូល ឯគល់ស្លឹកមានរាងបេះដូង មូល ឬខូងបន្តិច ។

ស្លឹកមានទំហំ 3-5 សង់ទីម៉ែត្រនិងមានប្រវែង 7-12 សង់ទីម៉ែត្រ បន្ទះស្លឹកផ្នែកគល់មានពណ៌បៃតងចាស់និងមូល ឯ​ខាងចុងពណ៌រាងស្រាល ។

សរសៃចំកណ្ដាលស្លឹកផ្នែកគល់រាងស្ដើង ឯខាងចុងរាងក្រាស់ មានសរសៃខ្នែងចំនួនពី 7-11 គូ ឃើញមិនសូវច្បាស់ ឯ ទងស្លឹកមានប្រវែង 4 សង់ទីម៉ែត្រ ។

ផ្កាជើងចាប

ជើងចាបចេញផ្កាទោល ដោយចេញតាមប្រកៀបទងស្លឹកជិតចុងមែក ឬនៅចុងមែក មានពណ៌សព្រលាំបៃតង ពេលរីកចេញពណ៌បៃតងព្រលាំលឿង ហើយពេលរោយគឺរោយទាំងកញ្ចុំ ។

ទងផ្កាមានប្រវែង 5 មីលីម៉ែត្រ ឯត្របកផ្កាជាប់គ្នាដូចស៊ីឡៅ ប្រវែង 2-3 សង់ទីម៉ែត្រ ដោយមានសរសៃពុះកណ្ដាលប្រវែង 0.7-1 សង់ទីម៉ែត្រ ចុងមានរាងដូចស៊ីឡៅមូលចុង ចំណែកត្របកស្រោបគល់ផ្កាមានរាងពងក្រពើ ពណ៌បៃតង មានទំហំ 3 មីលីម៉ែត្រ ។

ជើងចាបនឹងចេញផ្កានៅចន្លោះខែមិថុនាដល់សីហា ។

ផ្លែជើងចាប

  

ជើងចាបចេញផ្លែជាកញ្ចុំ ទងកញ្ចុំផ្លែមានប្រវែងប្រហែល 5 មីលីម៉ែត្រ មានផ្លែចំនួនប្រហែល 6-12 ផ្លែ ចេញពីទងកញ្ចុំតែមួយ ។ សណ្ឋានរបស់ផ្លែមានរាងដូចបំពង់វែង ចុងផ្លែរាងស្រួច ។ ក្នុងផ្លែមានគ្រាប់ពណ៌ត្នោតប្រហែល 2-5 គ្រាប់ នៅតម្រៀបគ្នា និងមានសណ្ឋានពងក្រពើ ។

សម្បកផ្លែមានគន្លាក់តាមចំនួនគ្រាប់ចន្លោះពី 2-4 គន្លាក់ ដោយពេលខ្ចីមានពណ៌បៃតងព្រលាំស ពេលចាស់នឹងប្ដូរជាពណ៌ក្រហមស្រស់ ឬពណ៌ក្រមៅ ។

ជើងចាបចេញផ្លែនៅចន្លោះខែតុលា-វិច្ឆិកា ។

២.អត្ថប្រយោជន៍របស់ជើងចាប

ក្រៅពីធ្វើជាថ្នាំកែរោគហើយ ជើងចាបអាចដាំធ្វើជាឈើលម្អនិងជាចំណីសត្វផងដែរ ប៉ុន្តែក៏មនុស្សក៏អាចទទួលផ្លែជើងចាបបាន ។

ប្រភពឯកសារៈវេបសាយបរទេស

ប្រភពរូបភាពៈGoogle