លាំងសាត

លាំងសាត ឬ ឡង់កង់ មានឈ្មោះសាមញ្ញថា Langsat, Lancet, Lan​g​sium មានឈ្មោះវិទ្យាសាស្រ្ត ថា Lansium parasiticum ស្ថិតក្នុងអម្បូរ MELIACEAE ។

លាំងសាត មានប្រភពនៅអាស៊ីអាគ្នេយ៍និងផ្ការបស់វាជាផ្កាតំណាងឲ្យកោះស៊ូម៉ាត្រា ប្រទេសឥណ្ឌូនេស៊ី ។

លាំងសាត ( ន. ) ( ស. ) (លាងសាត អ. ថ. ល៉ាង--) ឈ្មោះ​ឈើ​មួយ​ប្រភេទ ផ្លែ​ជាប់​គ្នា​រដឹក​ចេញ​ពី​ស្មែង​សំបក​ផ្លែ​ស្តើង​សម្បុរ-ស សាច់​ជា​ក្លែប​ៗ​ដូច​បង្គៅ តែ​ជ្រាយ​បន្តិច​ជាង​បង្គៅ មាន​រស​ផ្អែម​លាយ​ជូរ​បន្តិច​ៗ, បរិភោគ​បាន, គ្រាប់​មាន​រស​ល្វីង ។ [វចនានុក្រមខ្មែរ សម្ដេចសង្ឃរាជជួនណាត]

លាំងសាត
ចំណាត់ថ្នាក់វិទ្យាសាស្រ្ត
អាណាចក្រ	Plantae
(unranked)	Angiosperms
(unranked)	Eudicots
(unranked)	Rosids
លំដាប់	Sapindales
អម្បូរ	Meliaceae
ពួក	Lansium
ប្រភេទ	L. parasiticum
ឈ្មោះទ្វេនាម Lansium parasiticum (Osbeck) Sahni & Bennet
វេវចនសព្ទ ü  Aglaia aquea (Jacq.) Kosterm. ü  Aglaia domestica (Corrêa) Pellegr. ü  Aglaia dookoo Griff. ü  Aglaia intricatoreticulata Kosterm. ü  Aglaia merrillii Elmer nom. inval. ü  Aglaia sepalina (Kosterm.) Kosterm. ü  Aglaia steenisii Kosterm. ü  Amoora racemosa Ridl. ü  Lachanodendron domesticum (Corrêa) Nees ü  Lansium domesticum Corrêa ü  Melia parasitica Osbeck

មាតិកា

១.លក្ខណៈរុក្ខសាស្រ្ត

២.ឈ្មោះជាភាសាផ្សេងទៀត

៣.សព្វគុណរបស់លាំងសាត

៤.អត្ថប្រយោជន៍របស់លាំងសាត

៥.តម្លៃអាហារូបត្ថម្ភក្នុង 100 ក្រាម

១.លក្ខណៈរុក្ខសាស្រ្ត

ដើមសាំងសាត

លាំងសាតជាដើមឈើងតំបន់ក្ដៅសើម (ត្រូពិច) ។  ដើមរបស់វាមានកម្ពស់ដល់ទៅ 30 ម៉ែត្រនិងមានអង្កត់ផ្ចិត 75 សង់ទីម៉ែត្រ ។ បែកមែកពីពាក់កណ្ដាលដើមឡើងទៅ ដោយមែកលូតត្រង់ ។ សំបកដើមមានពណ៌ប្រផេះ មានសាច់គ្រើម ។

វាលូតលាស់បានល្អនៅលើដីផុរ ឬ ដីផុសលាយខ្សាច់ និងជារុក្ខជាតិដែលចូលចិត្តពន្លឺព្រះអាទិត្យ សំណើមនិងទឹកក្នុងកម្រិតមធ្យម ។

លាំងសាត បន្តពូជដោយការព្រោះគ្រាប់, ផ្សាំ ។

ស្លឹកសាំងសាត

លាំងសាតជាស្លឹកច្រើន មានពណ៌បៃតងចាស់ រាងដូចពងក្រពើ ចេញឆ្លាស់គ្នាឆ្វេងស្ដាំ គល់ស្លឹកមានរាងមូល គែមស្លឹកស្មើ ផ្ទៃស្លឹកមានជាតិរលោង ផ្ទៃក្រោមស្លឹកមានខ្សែប៉ោង ។

ផ្កាលាំងសាត

ផ្កាលាំងសាតជាផ្កាទ្វេភេទ ចេញផ្កាជាកញ្ចុំពណ៌ស ដោយចេញតាមដើមនិងមែក  ។

ផ្លែលាំងសាត

លាំងសាត ចេញផ្លែជាចង្កោម ។ ផ្លែខ្ចីមានពណ៌បៃតង ពេលទុំមានពណ៌លឿង ។ ផ្លែមានរាងមូល សំបកស្ដើងរលោង មានជ័រច្រើនពណ៌សខាប់ ចំណែកសាច់ខាងក្នុងទន់ ជ្រាកទឹក មានរសជាតិផ្អែមឆ្ងាញ់ ខ្លះជូរអែម ។

ផ្លែលាំងសាតមានគ្រាប់ច្រើនប្រហែល 5 គ្រាប់ មានពណ៌ត្នោត រាងទ្រវែងសំប៉ែត​ សំបករលោង មានស្រោមស្ដើង សាច់គ្រាប់មានពណ៌ស មានរសជាតិចត់ខ្លាំង ។ 

២.ឈ្មោះជាភាសាផ្សេងទៀត

ü  ភាសាខ្មែរ: ឡង់កង់, លាំងសាត

ü  ភាសាតាកាឡុក: lansones, buwa-buwa

ü  ភាសាថៃ: langsad (ลางสาด) (សម្រាប់ពូជសម្បកស្ដើង), longkong (ลองกอง) (សម្រាប់ពូជសម្បកក្រាស់)

ü  ភាសាបេងកាល់: lotka, bhubi

ü  ភាសាបាលី: ceruring

ü  ភាសាភីលីពីនបែបអេស្ប៉ាញ: lanzón (ពហុវចនៈ : lanzones)

ü  ភាសាភូមា: langsak, duku

ü  ភាសាម៉ាឡាយ៉ូ: langsat, lansa, langseh, langsep, duku, dokong

ü  ភាសាវៀតណាម: dâu da đất, lòn bon, bòn bon

ü  ភាសាសិង្ហល: gadu guda

ü  ភាសាសឺបួ: buahan, lansones

ü  ភាសាអង់គ្លេស: langsat, lanzones

ü  ភាសាឥណ្ឌូនេស៊ី: duku, langsat, kokosan

   

៣.សព្វគុណរបស់លាំងសាត

យកគ្រាប់បុកលាយទឹកភ្លៀងឲ្យខាប់ ហើយបន្តក់ត្រចៀក, បំបាត់អាការលាក, ហើមឬបូសក្នុងត្រចៀកបាន ។

ü  សំបកដើមមានរសជាតិចត់ អាចធ្វើជាថ្នាំព្យាបាលជំងឺគ្រុនក្ដៅនិងជំងឺពោះវៀន ។

ü  សំបកផ្លែមានសារធាតុ oleoresin ជួយកាត់បន្ថយអាការឈឺពោះ ។

ü  សំបកផ្លែអាចជួយព្យាបាលជំងឺរាករូស ដោយហាន់សំបក ហើយឆុងនឹងទឹកក្ដៅ ទទួលទានម្ដងកន្លះពែង ។

ü  ជួយបញ្ចុះបរាសិត ។

ü  គ្រាប់របស់វាជួយព្យាបាលជំងឺ Herpes simplex និង Herpes zoster បាន ។

៤.អត្ថប្រយោជន៍របស់លាំងសាត

ü  ជាទូទៅលាំងសាតត្រូវបាននិយមទទួលទានផ្លែស្រស់ វាមានរសផ្អែមឆ្ងាញ់ ថែមទាំងមានអត្ថប្រយោជន៍ផ្នែកអាហារូប-ត្ថម្ភទៀតផង ដោយសាច់របស់វាមានជាតិកាបូអ៊ីដ្រាត, កាកសរសៃ, ប្រតេអ៊ីន, កាល់ស្យូម, ជាតិដែក, ផូស្វរ, វីតាមីន B1, B2 និង C ។

ü  គ្រាប់របស់វាមានអាស៊ីតអាល់កាឡូអ៊ី (ជាតិទឹកក្បុង) ដែលពឹសចំពោះដង្កូវនិងសត្វល្អិត អាចយកវាទៅធ្វើជាថ្នាំបាញ់កម្ចាត់សត្វល្អិតបាន ដោយយកគ្រាប់លាំងសាតចំនួន 1 គីឡូក្រាម បុកឲ្យម៉ដ្ឋ លាយនឹងទឹកចំនួន 20 លីត្រ ទុកចោល 1 ថ្ងៃ ហើយត្រងយកតែទឹក ប៉ុណ្ណឹងជាការស្រេច អាចប្រើការបាន ។

ü  សំបកផ្លែក្រៀម វាមានក្លិនស្អុយ អាចដុតបង្ហុយផ្សែង បណ្ដេញមូសបាន ។

៥.តម្លៃអាហារូបត្ថម្ភក្នុង 100 ក្រាម
ឈ្មោះ	ទម្ងន់	ភាគរយ
ថាមពល	66 kcal
កាបូអ៊ីដ្រាត	0.9 g
ជាតិស្ករ	0.1 g
ជាតិសរសៃ	0.3 g
ជាតិខ្លាញ់	0.1 g
ប្រូតេអ៊ីន	0.9 g
វីតាមីន
វីតាមីន A	15 μg	-
វីតាមីន B1	1 0.08 mg	-
វីតាមីន B2	2 0.04 mg	-
វីតាមីន B3	3 1.7 mg	-
វីតាមីន C	24 g	-
ធាតុរ៉ែ
កាល់ស្យូម	5 mg	-
ជាតិដែក	0.7 mg	-
ផូស្វ័រ	35 mg	-
ធាតុផ្សំផ្សេងទៀត
ទឹក		80%
kcal (kilocalorie) = កាឡូរី μg (micrograms) = មីក្រូក្រាម mg ( milligrams) = មីលីក្រាម

ប្រភពឯកសារៈវេបសាយបរទេស

ប្រភពរូបភាពៈGoogle