របាំតោ ឬ ម៉ុងសាយ

របាំតោ ឬ ម៉ុងសាយ មានប្រភពពាក្យមកពីភាសាចិនកាតាំង ឬចិនក្វាងទុង តែភាសាចិនផ្លូវការ ឬចិនកុកងឺអានថា អ៊ូស៊ឺ ។

របាំតោ ឬ ម៉ុងសាយ (ចិនកាត់ៈ舞狮, ចិនពេញៈ舞獅, ភីងអ៊ីនៈ wǔ shī , អង់គ្លេសៈ Lion Dance) ជាប្រពៃណីរាំមួយប្រភេទនៃវប្បធម៌ចិននិងប្រទេសផ្សេងទៀតនៅទ្វីបអាស៊ី ដែលអ្នកសម្ដែងត្រាប់តាមកាយវិការរបស់សត្វតោនៅក្នុងឈុតម៉ូដសត្វតោ ដែលកាយវិការទាំងនេះមានឃើញតាមក្បាច់គុនចិនច្រើនប្រភេទ ។

舞獅 (wǔ shī) ចិនផ្លូវការ ឬចិនកុកងឺ = Lion Dance = តោរាំ (របាំតោ)

舞獅  (舞mou5  獅  si1 ) ចិនកាតាំង ឬចិនក្វាងទុង = Lion Dance = តោរាំ (របាំតោ)

ម៉ុងសាយ (ន. ) (ចិ.) ក្រុម​របាំ​ប្រពៃណី​ចិន រួម​សម្ដែង​ដោយ​សិល្បករ​ពាក់​ក្រណាត់​ច្នៃ​ជា​រូប​នាគ ហក់​លោត ធ្វើ​ត្រាប់​តាម​កាយ​វិការ​សត្វ​សាហាវ​ពិតៗ កំដរ​ដោយ​អ្នក​វាយ​ស្គរ​វាយ ឆាប់​លាន់​ទ្រហឹង​អឺងអាប់ ។ របាំ​នេះ​មាន​គោល​បំណង បណ្ដេញ​កម្ចាត់​ភាវៈ​អាក្រក់​ឧបទ្រព​ចង្រៃ​ផង​ទាំង​ពួង ដើម្បី​នាំ​មក​នូវ​សិរី​សួស្ដី​ដល់​ក្រុម​គ្រួសារ​ម្ចាស់​ផង ។ [វចនានុក្រមខ្មែរ សម្ដេចសង្ឃរាជជួនណាត]

របាំតោ ជាធម្មតាសម្ដែងនៅថ្ងៃចូលឆ្នាំចិននិងពិធីផ្សេងៗតាមប្រពៃណី វប្បធម៌និងសាសនារបស់ជនជាតិចិន ដូចជា សម្ពោធមុខជំនួញ, អបអរក្នុងពិធីពិសេស ឬមង្គលការ ជាដើម ។

ការរាំរបាំតោមាន 2 ប្រភេទគឺ តោខាងជើងនិងតោខាងត្បូង ។ ការសម្ដែងទាំង 2 ប្រភេទនេះតែងតែបានឃើញទូទាងប្រទេសចិន ឯនៅតំបន់ផ្សេងទៀតនៅអាស៊ីអាគ្នេយ៍ តែងតែឃើញកការរបាំតោបែបខាងត្បូងច្រើនជាង តាមរយៈការចំណាកស្រុករបស់ជនជាតិចិនដែលភាគច្រើនមានដើមកំណើតមកពីចិនភាគខាងត្បូង ។

ការរាំរបាំតោប្រភេទផ្សេងទៀត មានឃើញនៅប្រទេសជប៉ុន, កូរ៉េ, ទីបេ, វៀតណាម និងមានការរាំរបាំតោមួយប្រភេទទៀតតាមវប្បធម៌ឥណ្ឌូនេស៊ី តែជាប្រពៃណីខុសគ្នានិងហៅថាបារុង (Barong) ។